हामी सबैकाे संसारन्यूज

मचिन्द्र खत्री धरान, सुनसरी

कल्कल कोसी, बग्दछ पानी
झर्दछ पग्ली श्वेत हिमानी ।
लाग्दछ चाँदी उत्तर घेरो
सुन्दर सानो देश छ मेरो ।।१

नूतन झर्ना दिव्य मुहान
कञ्चन शोभा साँझ बिहान ।
साल र सल्लो जङ्गल फेरो
सुन्दर सानो देश छ मेरो ।।२

लेक र बेँसी खेत र बारी
भीर र पाखा जङ्गल घारी ।
जीवन मार्दै बित्दछ फेरो
सुन्दर सानो देश छ मेरो ।।३

उड्दछ डाँफे शैलुङ सोती
चर्दछ सेता ऊ हिउँ मोती ।
भर्दछ पानी तुङ्ग पँधेरो
सुन्दर सानो देश छ मेरो ।।४

टल्टल लाग्ने घाम छ तातो
झल्झल आभा फाल्दछ रातो ।
नास्दछ सारा रात अँध्यारो
सुन्दर सानो देश छ मेरो ।।५

बाहुन शेर्पा दाजु र भाइ
एक छ अर्को हात समाई ।
भन्दछ थारू साँझ सबेरो
सुन्दर सानो देश छ मेरो ।।६

राष्ट्र भएमा मात्र सबै छौँ
जात र मान्छे एक सबै हौँ ।
गौरव गर्दै उड्छ चमेरो
सुन्दर सानो देश छ मेरो ।।७

चर्दछ चौँरी लेक हिमाल
भर्दछ शोभा शैल र ताल ।
लाउँछ आफ्नो जीवन फेरो
सुन्दर सानो देश छ मेरो ।।८

फुल्दछ रातो फूल गुराँस
छर्दछ मीठो दिव्य सुवास ।
पाउँछ आभा झल्झल फेरो
सुन्दर सानो देश छ मेरो ।।९

शास्त्रीय छन्द : रुक्मवती
सुत्र : भमसग