हामी सबैकाे संसारन्यूज

२१ चैत,काठमाडौँ  । प्रकृतिका पुजारी तथा राष्ट्रप्रेमी लमजुङे कवि मेदिनीनाथ सुवेदीको काठमाडांँ कलङ्कीस्थित उहाँको आफ्नै निवासमा निधन भएकोे छ । उहाँ ७९ वर्षको हुनुहुन्थ्यो ।

सुवेदीका आफन्तसमेत रहनुभएका डा. जीवन अधिकारीले सुवेदीको आइतबार साँझ निधन भएको बताउनुभयो । विगत चार वर्षदेखि मस्तिष्कघातका कारण थला पर्नुभएका सुवेदीको आज पशुपति आर्यघाटमा हिन्दू संस्कारअनुसार अन्त्येष्टि गरिएको उहाँकी छोरी गीता सुवेदीले बताउनुभयो ।

विसं १९९५ कात्तिक २ गते लमजुङको सिम्पानी–९ जन्मिनुभएका सुवेदीको छन्दबद्ध कवितामा अलङ्कार र रसको ओझिलो सङ्गम रहेको छ ।

उहाँका ‘मस्र्याङ्दीका सुसेली’, ‘मेदिनीको समस्याको कुटुरो’, ‘डाँफेदूत’ (खण्डकाव्य), ‘लमजुङे सुवेदीका कविता’ लगायत दर्जनौँ फुटकर कविता प्रकाशित छन् भने गद्यतर्फ ‘आँखीझ्यालबाट डिल्लीजङ्गलाई हेर्दा’ (अप्रकाशित) कृति रहेका छन् । रासस