हामी सबैकाे संसारन्यूज

काठमाडौं । लघुबीमा कम्पनीले शेयर बजारमा लगानी गर्न पाउने भएका छन् । नेपाल बीमा प्राधिकरणले लघुजीवन तथा निर्जीवन बीमकको लगानी निर्देशिका जारी गर्दै लघुबीमा सम्बन्धी सीमा निर्धारण गरेको हो । प्राधिकरणले निर्धारण गरेको क्षेत्रमा शेयर बजारसँगै लघुबीमा कम्पनीहरुले अन्य आठ वटा क्षेत्रमा लगानी गर्न पाउने भएका हुन् ।

निर्देशिकामा लघुबीमा कम्पनीहरुलाई विभिन्न क्षेत्रमा लगानी गर्न शर्तसहित सीमा समेत तोकिएको छ । लघुबीमा व्यवसाय सञ्चालन गर्ने जीवन र निर्जीवन बीमा कम्पनीले विभिन्न क्षेत्रमा कम्तीमा पाँच प्रतिशतभन्दा बढी लगानी गर्न पाउने भएका हुन् ।

धितोपत्र विनिमय बजारमा सूचीकृत कम्पनीको बन्ड, डिवेन्चर र ऋणपत्रमा कूल लगानीको बढीमा २० प्रतिशतसम्म लगानी गर्न पाइने सीमा निर्देशिकामा गरिएको छ । कम्पनीहरुले ख वर्गको बैंक तथा वित्तीय संस्थाको मुद्दति र शेयर बजारमा बढीमा १० प्रतिशतसम्म मात्रै लगानी गर्न पाउनेछन् ।

ग वर्गको बैंक तथा वित्तीय संस्थाको मुद्दति र नागरिक लगानी कोष तथा म्युचुअल फण्डका लगानी योजनाहरुमा भने कम्पनीहरुले बढीमा ५ प्रतिशतसम्म लगानी गर्न पाउने सीमाको निर्धारण निर्देशिकामा गरिएको छ । तर, लघुबीमा कम्पनीहरुले अन्य सहायक कम्पनीमा लगानी गर्नुअघि भने प्राधिकरणको स्वीकृति लिनु पर्ने हुन्छ ।

लघुबीमा कम्पनीहरुले लगानीको सीमालाई प्रत्येक दिन कायम गर्नुपर्ने हुन्छ । कुनै कारणले तोकिएको सीमाभन्दा कम वा बढी लगानी भएमा तीस कार्यदिनभित्र त्यस्तो लगानीलाई सीमाभित्र ल्याई सक्नु पर्ने हुन्छ । तर, मुद्दति निक्षेप वा डिबेन्चरमा गरिएको लगानी परिपक्व नभएसम्म सो रकम बराबरको लगानी तोकिएको निर्देशन बमोजिम भएको मानिने समेत प्राधिकरणले खुलाएको छ ।

लघुबीमा कम्पनीहरुले बैंक तथा वित्तीय संस्थामा लगानी गर्दा निश्चित शर्त पालना गर्नुपनर्ने हुन्छ । कम्पनीहरुले बैंक तथा वित्तीय संस्थामा लगानी गर्दा कम्तीमा तीन वटा शर्त पालना गर्नुपर्ने छ । राष्ट्र बैंकले तोकेको पुँजीकोष कायम गरेको, तोकेको सीमाभन्दा बढी निष्कृय कर्जा नरहेको र शीघ्र सुधारात्मक कारवाहीमा नपरेको हुनुपर्ने छ ।