हामी सबैकाे संसारन्यूज

काठमाडौं । लगानीयोग्य तरलता अभाव र उच्च ब्याजदरको प्रभाव उद्योग तथा व्यवसायमा देखिन थालेको छ । जसले गर्दा भएका उद्योग तथा व्यवसाय समस्यामा पर्न थालेका छन् भने नयाँमा लगानीको लागि पुँजी जुट्न गाह्रो हुन थालेको छ ।

नेपाल उद्योग परिसंघको एक अध्ययनअनुसार पछिल्लो समय करिब ६९.४४ प्रतिशत व्यवसायीहरु उद्योग व्यवसायमा थप लगानीबाट पछि हटेका छन् । परिसंघको अध्ययनअनुसार कृषि क्षेत्रमा ८५.७१, अटोमोबाइल क्षेत्रमा १ सय, सिमेन्ट उत्पादन क्षेत्रमा, ८३.३, इन्जिनियरिङ र निर्माण कम्पनी क्षेत्रमा ७१.४, ई–कमर्स क्षेत्रमा ५०, एफसीजी क्षेत्रमा ४१.७, एपलपीजी ग्यासमा ५०, आइटी क्षेत्रमा ४५.५ र अन्य क्षेत्रमा ७२.२ प्रतिशत उद्यमीहरु व्यवसायमा थप लगानीबाट पछि हटेका छन् ।

त्यस्तै, प्लास्टिक क्षेत्रमा ८०, रियल स्टेट क्षेत्रमा ४०, एसएमईज क्षेत्रमा ४२.९, स्टिल क्षेत्रमा ८५.७ र गार्मेन्ट क्षेत्रमा ८५.७ प्रतिशत उद्यमीहरु व्यवसायमा थप लगानी गर्नबाट पछि हटेको अध्ययनले देखाएको छ ।

पछिल्लो समयमा बजारमा कच्चा पदार्थको औसत मूल्यमा २३ प्रतिशतले वृद्धि भएको छ भने र बैंकिङ ब्याजदर वृद्धि भएर १४ प्रतिशत भन्दा बढी पुगेको छ । जसले गर्दा सम्भावित मुनाफा र लगानीको अन्तर खुम्चिँदै गएको कारण लगानीकर्ताहरु आफ्नो उद्यम तथा व्यवसायमा थप लगानीबाट पछि हटेका हुन् ।

उद्योग विभागको तथ्यांकअनुसार पनि मंसिर महिनामा ठूलो मात्रामा लगानी घट्न पुगेको छ । गत वर्षको मंसिर महिनाको तुलनामा चालु आर्थिक वर्षको सोही महिनामा ६६.३८ प्रतिशतले घटेको विभागको तथ्यांकले देखाएको छ ।

गत वर्षको मंसिरमा देशभर १८ वटा उद्योगले १६ अर्ब ९८ करोड १९ लाख रुपैयाँको लगानी प्रतिबद्धता जनाएका थिए । तर, चालु आर्थिक वर्षको सोही अवधिमा १० वटा उद्योगले ५ अर्ब ७० करोड ९३ लाख रुपैयाँको लगानी प्रतिबद्धता सहित दर्ता भएका छन् ।

त्यस्तै, गत वर्षको मंसिर महिनामा ७ वटा ठूला, ७ वटा मध्यम र ४ वटा साना उद्योग दर्ता भएका थिए । त्यसमध्ये ४ वटा विदेशी लगानीका उद्योग दर्ता भएका थिए ।