हामी सबैकाे संसारन्यूज

काठमाडौं । मंसिर ४ गते सम्पन्न प्रतिनिधि सभा र प्रदेश सभा निर्वाचनको अन्तिम परिणाम, दलहरुको संसदीय दलको नेता चयन, सांसदहरु सपथ ग्रहण पछि अव दलहरु नयाँ सरकारको गठनको तयारीमा रहेका छन् ।

राष्ट्रपति विद्यादेवी भण्डारीले गत पुस ३ गते ७ दिनभित्रमा नयाँ सरकार बनाउनका लागि दिएको समयसीमा आज साँझ पाँचबजे सकिदैछ । राष्ट्रपति भण्डारीले दुई वा दुई भन्दा बढी दल मिलेर नयाँ सरकार गठन गर्न गरेको आव्हान अनुसार सत्ता गठबन्धन दलभित्र पटक–पटक छलफल र संवाद भएपनि उनीहरु प्रधानमन्त्री र राष्ट्रपति कुन दलको बन्ने भन्ने विषयमा टुंगोमा पुग्न सकेका छैनन् । यद्यपी नेपाली कांग्रेसका सांसदहरुले पहिलो प्रधानमन्त्री सभापति शेरबहादुर देउवा नै बन्नुपर्ने दावी गर्दै आएका छन् भने गठबन्धनको बैठकमा पनि कांग्रेसका शिर्ष नेताहरुले प्रधानमन्त्री राष्ट्रपति दुवै पद कांग्रेसले नछाड्ने अडान लिँदै आएको श्रोतले जनाएको छ ।

शनिबार अपरान्ह प्रधानमन्त्री निवास बालुवाटारमा बसेको गठबन्धनका दलहरुको बैठकमा कांग्रेस, माओवादी, एकिकृत समाजवादी पार्टीका क्रमश शेरबहादुर देउवा, पुष्पकमल दाहाल ‘प्रचण्ड’, माधवकुमार नेपालबीच आलोपालो प्रधानमन्त्री बन्ने विषयमा निर्णय भएपनि पहिलो प्रधानमन्त्री को बन्ने भन्ने विषयमा टुंगो लगाउन सकिएको छैन ।

यता संसदको दोस्रो ठूलो दल नेकपा एमाले सरकार गठनको औपचारिक तयारीमा जुट्न सकेको छैन् भने गठबन्धनका दलहरु आज बिहान बैठक बसेर पहिलो कार्यकालको प्रधानमन्त्री को बन्ने भन्ने विषयमा टुंगो लगाउने बताइएको छ । यद्यपी आज बिहान गठबन्धनको बैठक बस्ने भनिएपनि बैठक अहिलेसम्म सुरु हुन सकेको छैन ।