हामी सबैकाे संसारन्यूज

काठमाडौं ।  सत्ता साझेदार दलहरु निर्णायक छलफलमा छन् । तर, दलहरुबीच सहमति हुने विषय निकै सकसपूर्णं देखिएको छ । गठबन्धनका मुख्य दुई दल नेपाली कांग्रेस र माओवादी केन्द्र पूर्ववत् अडानमै रहेका कारण सहमति सहज नदेखिएको हो ।

कांग्रेसले राष्ट्रपति र प्रधानमन्त्री पद सुरक्षित गर्न खोजेको छ भने माओवादी केन्द्रले दुईमध्ये एकमा आफ्नो दाबी गरेको छ । माओवादी केन्द्रले दुईमध्ये एक पद नपाए सहमति नगर्ने अडान राखेको छ ।

माओवादी केन्द्रका नेता गणेश शाहले बताएअनुसार राष्ट्रपति र प्रधानमन्त्री दुवै पद कांग्रेसले नछाडे गठबन्धन नै भत्किन सक्छ । “राष्ट्रपति र प्रधानमन्त्री दुवै पद कांग्रेसले पाउने अवस्था हुन्न, यदि दुईमध्ये एक पद छाड्ने स्थिति नभएमा सहमति हुँदैन”, उनले भनेका छन्, “त्यस्तो अवस्थामा गठबन्धन नरहन सक्छ ।”

कांग्रेसको भने दुवै पद लिने र अरुमा खुला हुने बटमलाइन छ । गठबन्धन बैठकअघि कांग्रेसका नेता विमेलन्द्र निधिले खुमलटारमै पुगेर देउवाको अडान स्पष्ट गरेका थिए । उनले गठबन्धन कायमै राख्नुपर्ने तर, दुई पद कांग्रेसलाई नै दिनुपर्ने बताएका थिए ।

एमालेसँग बेग्लै छलफलमा माओवादी

कांग्रेससँग छलफलमा रहेको माओवादी केन्द्र एमालेसँग पनि निरन्तर छलफलमै छन् । माओवादी केन्द्रका नेता वर्षमान पुनलगायतका नेताहरु एमालेसँगको वार्तामा छन् । यदि कांग्रेससँग सहमति नभए एमालेसँग सहमति गर्ने माओवादी गरेको छ ।

तर, माओवादीका नेता शाहले बताएअनुसार एमालेसँग पनि सहमतिको सम्भावना कम छ । एमालेले पनि राष्ट्रपति र सभामुखमा अडान राखेको छ । जुन दुवै पद दिँदा असहज हुने माओवादीको निक्र्योल छ ।

“यदि एमालेले दुवै पद राख्ने अवस्था बन्यो भने सहमति हुन सक्दैन”, उनले भनेका छन्, “दुवै महत्वपूर्णं पद राख्दा यसअघिकै नियति दोहोरिन सक्छ ।”