हामी सबैकाे संसारन्यूज

काठमाडौं । देशका विभिन्न जिल्लाका विभिन्न ठाउमा नौ जनाको शव फेला परेको छ ।

मृत भेटिनेमा रुकुमकी १३ वर्षीया बालिका, दाङका ७० वर्षीय वृद्ध, दार्चुलाकी २२ वर्षीया युवती, गोरखाका ६५ वर्षी पुरुष, गुल्मीका ७४ वर्षीय वृद्ध, मोरङका ५५ वर्षीय पुरुष, काठमाडौंका ३२ वर्षीय युवा, रुपन्देहीका ३० वर्षीय युवा र चितवनका ३२ वर्षीय युवा गरी नौ जना मृत अवस्थामा फेला परेको प्रहरीले जनाएको छ ।

प्रहरीका अनुसार रुकुम पश्चिम, आठबिसकोट नगरपालिका–६ ज्यामिरेका कर्ण बहादुर बोहोराकी छोरी १३ वर्षीया धनिसा बोहोरा सोही नगरपालिका–६ कोट ज्यामिरे पाखामा शनिबार मृत भेटिएकी छन् । शुक्रबार बिहानदेखि बेपत्ता भएकी उनको खोजी गर्ने क्रममा उक्त पाखामा शव फेला परेको हो ।

दाङ, घोराही उपमहानगरपालिका–८ सौडीगाउँ बस्ने ७० वर्षीय हिमलाल चौधरी सोही ठाउँ सौडी सोतास्थित जमेको पानीमा शनिबार मृत अवस्थामा फेला परेका छन् ।

त्यस्तै दार्चुला, शैल्यशिखर नगरपालिका–९ गोकुलेश्वरस्थित चौलानी नदीको किनारामा सोही नगरपालिका–२ तौंकी बस्ने २२ वर्षीया धनमती भट्ट शनिबार मृत अवस्थामा फेला परेकी छिन् ।

गोरखा, सिरानचोक गाउँपालिका–४ ब्राहबिसेस्थित गोरेटो बाटो छेउमा सोही गाउँपालिका–४ माझगाउँ बस्ने ६५ वर्षीय सिताराम पोखरेल शनिबार मृत अवस्थामा फेला परेका छन् ।

गुल्मी, मदाने गाउँपालिका–७ रोल्मा बस्ने ७४ वर्षीय सेते सार्की सोही ठाउँस्थित जंगलमा शनिबार मृत अवस्थामा फेला परेका छन् ।

मोरङ, सुनवर्षी नगरपालिका–९ भेरुवाथान बस्ने ५५ वर्षीय देविलाल सरदार आफ्नै घरमा आइतबार मृत अवस्थामा फेला परेका छन् ।

काठमाडौं, तारकेश्वर नगरपालिका–४ दगुर्नेपानीस्थित टहरोमा हाल नाम, थर, वतन नखुलेका अन्दाजी ३२ वर्षीय पुरुष शनिबार मृत अवस्थामा फेला परेका छन् ।

रुपन्देही, मायादेवी गाउँपालिका–७ बौरिहवास्थित माछा पोखरीमा हाल नाम, थर, वतन नखुलेका अन्दाजी ३० वर्षीय पुरुष शनिबार मृत अवस्थामा फेला परेका छन् ।

चितवन, ईच्छाकामना गाउँपालिका–४ कुरिनटार धारापानीस्थित त्रिशुली नदीको किनारमा हाल नाम, थर, वतन नखुलेका अन्दाजी ३२ वर्षीय पुरुष शनिबार मृत अवस्थामा फेला परेका छन् । यी घटनाका विषयमा थप अनुसन्धान गरिरहेको प्रहरीले जनाएको छ ।