हामी सबैकाे संसारन्यूज

काठमाडौं । आज बसेको उच्चस्तरीय राजनीतिक संयन्त्रको बैठकमा एमाले अध्यक्ष तथा संयन्त्रका संयोजक केपी शर्मा ओलीले रास्वपालाई पुनः सरकारमा ल्याउने विषयमा छलफल गरेका छन् ।

प्रधानमन्त्री निवास बालुवाटारमा शुक्रबार दिउँसो बसेको संयन्त्रको बैठकमा ओलीले रवि लामिछाने नेतृत्वको रास्वपालाई सरकारमा ल्याउनुपर्ने सुझाव प्रधानमन्त्री पुष्पकमल दाहाल ‘प्रचण्ड’ लाई दिएका छन् ।

नागरिकता विवादमा उपप्रधान तथा गृहमन्त्री र सांसद समेत रहेका रवि लामेछानेले दुवै पद गुमाउनु परेपछि उनको पार्टी गत आइतबार सरकारबाट बाहिरीएको थियो । सरकारलाई आफ्नो समर्थन भने रहिरहेको बताएको रास्वपालाई पुनः सरकारमा ल्याएर राजनीतिक सन्तुलन मिलाउनुपर्ने अध्यक्ष ओलीको जोड थियो । बैठकमा अध्यक्ष ओलीले भने–‘पूर्व समझदारी अनुरुप रास्वपालाई पुनः सरकारमा ल्याउने वातावरण मिलाऔं ।’

ओलीको सुझावमा प्रधानमन्त्री प्रचण्डले रास्वपा बाहिरिनुको कारण आफुले पनि बुझ्न नसकेको बताएका थिए । प्रधानमन्त्री प्रचण्डले रविलाई अन्तिम अवस्थासम्म पनि आफुले सरकार नछाड्न भनेको तर नमानेको समेत छलफलमा बताएका थिए ।

राष्ट्रपतिमा समझदारी नतोड्न ओलीको आग्रह

त्यसैगरी अध्यक्ष ओलीले राष्ट्रपतिमा बाहिर संचारमाध्यमा आएका कुराहरुका विषयमा पनि चासो राखेका थिए । ओलीको चासोमा प्रधानमन्त्री प्रचण्डले बाहिर आएका कुरामा आफुले ध्यान नदिएको तर राष्ट्रपतिका लागि राष्ट्रिय सहमति बनाएर जाँदा सबैलाई राम्रो हुने बताएका थिए ।

एमालेले गठबन्धनबीच भएको पूर्व सहमति अनुसार राष्ट्रपति पदमा आफ्नो दावी गर्दै आएको छ भने कांग्रेसबाट समेत विश्वासको मत पाएका प्रधानमन्त्री प्रचण्डले कांग्रेसको  पनि मन राख्ने गरी राष्ट्रपतिमा राष्ट्रिय सहमति बनाएर जानुपर्ने बताउँदै आएका छन् ।
ओलीले बैठकमा नागरिक उन्मुक्ति पार्टीले गठबन्धनमा पहिले भएको सहमति तोड्दा सुदूरपश्चिमको सरकार ढलेको भन्दै कसले कसलाई कहाँ अनि कसरी विश्वास गर्ने भन्दै प्रश्न गरेका थिए ।

‘हामीले सहमति गरेर बाँडफाँट गरेका थियौँ, तर, सुदूरपश्चिम सरकार एक महिनामै ढल्यो, त्यहीँबाट अस्थिरता सुरु भयो । अब यहाँ कसले कसलाई कसरी विश्वास गर्ने ?’ राष्ट्रपति पदको निर्वाचनप्रति इंगित गर्दै ओलीले शंसय व्यक्त गरे ।

ओलीले प्रधानमन्त्री प्रचण्डलाई पुष १० मा गठबन्धनबीच गरिएको समझदारी नतोड्न समेत  आग्रह गरेका थिए । पुष १० मा गरिएको भागबण्डामा एमालेलाई राष्ट्रपति दिने सहमती दलहरुबीच भएको एमालेले दावी गर्दै आएको छ ।

नागरिक उन्मुक्ति पार्टी, जनमत पार्टी र जनता समाजवादी पार्टी (जसपा) अनुपस्थित रहेको उक्त संयन्त्रको बैठकमा रास्वपाका सभापति रावि लामिछाने भने उपस्थिति थिए ।

आफ्ना नेता रेशम चौधरी लगायतलाई रिहा गर्नुपर्ने माग सरकारबाट सम्बोधन नभएको भन्दै सुदूरपश्चिमका मुख्यमन्त्री राजेन्द्र रावललाई विश्वासको मत नदिएको नागरिक उन्मुक्ति पार्टीले बिहीबारै आफुहरु गठबन्धनबाट बाहिरीएको बताएको थियो ।