Sansar News
काठमाडौं । सुदूरपश्चिम प्रदेशका मुख्यमन्त्री कमलबहादुर शाहलाई माओवादी केन्द्रले पनि विश्वासको मत दिने भएको छ । माओवादी केन्द्रले आफ्नो सुदूरपश्चिम प्रदेश संसदीय दललाई मत दिन निर्देशन दिएको हो ।
केन्द्रको निर्देशनपछि संसदीय दलको बैठक बसेर आधिकारिक निर्णय लिने तयारी गरिएको प्रदेश संसदीय दलका नेता खगराज भट्टले जनाएका छन् ।
यसअघि माओवादी केन्द्रको प्रदेश कमिटीले ‘यथास्थितिमा विश्वासको मत दिन नसकिने’ भनेको थियो । तर, केन्द्रदेखि सबै प्रदेश तहमा पनि सहकार्य गर्ने तयारी गरिरहेका बेला कांग्रेस र माओवादी केन्द्रको शीर्ष तहको छलफल पछि दिन सहमति भएको हो ।
गत माघ २६ मा मुख्यमन्त्रीमा नियुक्त भएका शाहले आइतबार विश्वासको मत लिँदैछन् । ५३ सदस्यीय प्रदेश सभामा शाहलाई बहमुत पुर्याउन २७ सांसदको आवश्यकता पर्दछ । तर, कांग्रेससँग मात्रै १९ सांसद छन् । जसको लागि अन्य पार्टीले सहयोग गर्नुपर्छ ।
यदि १० सिट भएको माओवादी केन्द्रले मात्रै सघाएमा पनि सहजै बहुमत पुग्नेछ । प्रदेशमा सभामुखसहित माओवादी केन्द्रसँग ११ सांसद छन् ।
माओवादी केन्द्र, नागरिक उन्मुक्ति पार्टी, एकीकृत समाजवादीले मत दिएमा शाहको पक्षमा दुई तिहाई बढीको समर्थन पुग्नेछ ।
सम्बन्धित समाचार
वि.सं.२०७९ फागुन २१ आइतवार ११:२८ मा प्रकाशित
