Sansar News
बाबुराम न्यौपाने ‘उत्स’, दमक, झापा
चन्द्रमामा खाजा खान्छन् मङ्गलमा खाना
यता भने बज्छ किन थोत्रो कर्कस गाना ।
आमा गर्छिन् मेला पर्म बाबु हलो जोत्छन्
पसिनामा पोतो चोब्दै यही धरती पोत्छन्
धाँजाधाँजा कुर्कुचा छन् कलेटी छ ओठमा
तर पनि सन्तुष्टिको मल्हम लाउँछन् चोट्मा ।
मीठो खानु राम्रो लाउनु एकादेशको कुरा
गरीबका मनका इच्छा कस्का हुन्छन् पूरा
इच्छाशक्ति बनेको छ हौसला र साथी
आकाश जत्रो मनलिई उड्छु माथिमाथि ।
चन्द्रमामा खाजा खान्छन् मङ्गलमा खाना
यता भने बज्छ किन थोत्रो कर्कस गाना ।
वि.सं.२०७९ चैत २५ शनिवार ०९:०८ मा प्रकाशित
