हामी सबैकाे संसारन्यूज

काठमाडौं । मिटरब्याजपीडितको माग समयमै समाधान गर्न राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले माग गरेका छन् । प्रतिनिधिसभाको मंगलबारको बैठकमा बोल्दै लिङ्देनले मिटरब्याजपीडितमाथि भएको दमनको पनि आलोचना गरे ।

उनले भनेका छन्, “देशमा कसैले पनि अन्यायमा पर्नु पर्दैन । कसैले पनि हेपिनु पर्दैन राज्य अभिभावक छ निमुखाहरूप्रति राज्य उभिनुपर्ने ठाउँमा न्यायको माग गर्दै आएको मिटरव्याजपीडितहरूलाई सरकारको हिजो जुन ढंगले आक्रमण गरेको छ । त्यसको निन्दा र भर्त्सना गर्छु ।”

सरकारले मिटरब्याजपीडितको समस्या तत्काल समाधान नगरे पार्टी आन्दोलनमा जाने पनि राप्रपा अध्यक्ष लिङ्देनको भनाइ थियो ।

“यतिबेला यस्तो सरकार छ जसले समाजमा गरिबहरूको अथवा सर्वहारा वर्गको अधिनायकत्व स्थापना हुनेछ भनेर सपना बाँड्ने पार्टीको नेतृत्वमा सरकार छ । तर, यतिनै बेलामा गरिबमाथि किन प्रहार भइरहेको छ”, उनले भनेका छन्, “हामी भन्न चाहन्छौं सरकारले मिटरव्याजपीडितहरू र तराईमा आन्दोलनमा रहेकाहरूको माग सम्बोधन गरोस् । अन्यथा राप्रपा उनीहरुको साथमा सडकमा जाने घोषणा गर्छु ।”