हामी सबैकाे संसारन्यूज

काठमाडौं । यातायात व्यवस्था विभागले नेपालमै बनेका सवारी साधन दर्ता गर्ने प्रक्रिया खुला गरेको छ । सरकारको निर्देशनपछि यातायात व्यवस्था विभागको बुधबार बसेको बैठकको निर्णयअनुसार यातायात व्यवस्थापन कार्यविधि निर्देशिका, २०६० लाई संशोधन गर्दै दर्ता प्रक्रिया खुला गरिएको हो । यातायात व्यवस्था विभागले बिहीबार एक सूचना जारी गर्दै कार्यविधि निर्देशिका संशोधन गरिएको जनाएको हो ।

यातायात व्यवस्था विभागले यातायात व्यवस्थापन कार्यविधि निर्देशिका २०६० को दफा ११.१ अन्तर्गत नयाँ बुँदा ११.१.९ थप गरेको हो। नयाँ व्यवस्थाअनुसार अब विदेशबाट पार्टपूर्जा पैठारी गरी नेपालमा जडान हुने वा नेपालमै उत्पादन हुने सवारी साधनको नयाँ दर्ता, सरुवा दर्ता, हेरफेर दर्ता, लिलाम दर्ता, पुनः दर्ता र नामसारीलगायत प्रजोजनका लागि प्रज्ञापनपत्र आवश्यक पर्नेछैन ।

त्यस्तै, नेपालमा जडान हुने वा उत्पादन हुने सवारीको नयाँ दर्ता, सरुवा दर्ता, हेरफेर दर्ता, लिलाम दर्ता, पुनस् दर्ता र नामसारी लयातका कार्यका लागि जडानकर्ता वा उत्पादक कम्पनीले भन्सार प्रज्ञापनपत्रको सट्टा मूल्य अभिवृद्धि कर विजक र प्रचलित कानुन बमोजिम अन्तः शुल्क तिरेको प्रमाण पेश गर्नुपर्ने हुन्छ।

नेपालमै बनेका सवारी साधन दर्ता प्रक्रिया नहुँदा सञ्चालन आउन कठिन भएको थियो । ‘यात्री’ नामको कम्पनीले आफ्नो उत्पादन बिक्री गर्न नसकेपछि कम्पनी बन्दै हुने अवस्थामा पुगेको थियो । जुन घटनालाई लिएर प्रधानमन्त्री पुष्पकमल दाहाल प्रचण्डले कार्यविधि संशोधन गर्न निर्देशन गरेका थिए । जसको आधारमा सरकारले नयाँ व्यवस्था ल्याएको हो ।