हामी सबैकाे संसारन्यूज

काठमाडौं । प्रहरीले वानएक्स बेट प्लेटफर्मको विज्ञापन तथा प्रचारप्रसार गरेको आरोपमा पक्राउ परेका कलाकारहरुको नाम सार्वजनिक गरेको छ । उपत्यका अपराध अनुसन्धान कार्यालयले पक्राउ परेका कलाकारको नाम सार्वजनिक गरेको हो ।

वानएक्स बेटिङ प्रकरणमा पक्राउ पर्ने कलाकारमा मरिचमान श्रेष्ठ ९बल्छी धुर्वे०, राजु पौडेल, पवन खतिवडा, एलिश राई, ज्वलन घर्तीमगर, गणेश देवकोटा, सरोज घिमिरे र वेगम नेपाली रहेका छन् ।

युट्युबसहित विभिन्न माध्यममा वानएक्स बेटको प्रचारप्रसार गरेको भेटिएपछि उनीहरुलाई पक्राउ गरेको प्रहरीले जनाएको छ । विभिन्न प्रोमो कोड प्रयोग गरी वानएक्स बेटिङमा छुट प्राप्त गर्न सकिने भन्दै उनीहरुले प्रचार गरेको प्रहरीको भनाई छ ।

यसअघि बुधबार मात्रै प्रहरीले वानएक्स बेटमार्फत एक अर्ब बढीको सट्टेबाजी गराउने पाँच एजेन्टलाई सार्वजनिक गरेको थियो । सामाजिक सञ्जालमा बेटिङ तथा क्यासिनो गेमिङ एपहरूको प्रचार तीव्र रूपमा हुन थालेपछि प्रहरीले अनुसन्धानलाई तिव्र बनाएको थियो ।

के हुन्छ कारबाही ?

नेपालको मुलुकी अपराध संहिता २०७४ को धारा १२५ मा जुवा खेल्न वा सट्टाबाजी गर्नु नहुने व्यवस्था छ । पहिलो पटक जुवा खेल्ने वा खेलाउनेलाई तीन महिनासम्म कैद वा ३० हजार रुपैयाँसम्म जरिवाना हुने उल्लेख छ ।

दोस्रो पटकदेखि जुवा खेल्ने वा खेलाउनेलाई एक वर्षसम्म कैद र ५० हजार रुपैयाँसम्म जरिवाना र त्यसपछिको कसूरमा पटकैपिच्छे थप तीन महिनासम्म कैद र १० हजार रुपैयाँसम्म जरिवाना हुने व्यवस्था छ ।

यदि पक्राउ परेका कलाकारमाथिको आरोप पुष्टि भएमा अपराध संहिताअनुसार सजायँ हुनेछ ।