हामी सबैकाे संसारन्यूज

काठमाडौं । निरन्तर राजनीतिको केन्द्रमा देखिएका पुष्पकमल दाहाल ‘प्रचण्ड’ थप शक्तिशाली बन्दै गएका छन् । सत्ता साझेदार तीन दल (माओवादी केन्द्र, एकीकृत समाजवादी र जनता समाजवादी) र सत्ता बाहिरको नेपाल कम्युनिष्ट पार्टीलाई मिलाएर समाजवादी केन्द्र निर्माण गरिएसँगै उनी थप शक्तिशाली देखिएका हुन् । संसद र संसदबाहिर उनको पक्षमा शक्ति थप बढेको छ ।

चार दल मिलेर मोर्चा गठन भएसँगै संसदमा मोर्चाबिना सरकार निर्माण करिब असम्भव जस्तै बनेको छ । मोर्चाको पक्षमा संसदभित्र ५४ सिट पुगेको छ । संसदमा मोर्चा आबद्ध दल माओवादी केन्द्रसँग ३२, जसपासँग १२ र एकीकृत समाजवादीसँग १० सिट छ ।

संसदको ठूलो सत्तारुढ नेपाली कांग्रेससँग एक्लै ८८ सिट छ भने प्रमुख प्रतिपक्षीको हैसियतमा रहेको एमालेसँग ७८ सिट छ । एमाले र कांग्रेस मिलेर सरकार गठन सम्भव छ तर, दुई दल एक्लाएक्लै रहँदा सरकार गठनका लागि मोर्चाको सहयोग अनिवार्य देखिन्छ । मोर्चा गठनसँगै न एमालेले मोर्चालाई बाहिर राखेर सरकार बनाउन सक्छ न कांग्रेसले ।

यस्तोमा सत्ताको नेतृत्वमा रहेका प्रचण्डलाई थप सहजता भएको देखिन्छ । उनको नेतृत्व थप लम्बिने आधारहरु पनि निर्माण भएका छन् ।

मोर्चा घोषणा पनि यीनै राजनीतिक दाउपेचबाट भएको मान्न सकिन्छ । स्वयम् प्रचण्डले पनि मोर्चा घोषणा सभामा विगतका अनुभवको आधारमा मोर्चा बनाइएको बताइएका थिए । “आज समाजवादी मोर्चा भनेर घोषणा गरेका छौं, यो हिजोको अनुभवको पनि नयाँ संश्लेषण भएको छ, अब हाम्रो सफलतालाई कसैलाई रोक्न सक्दैन”, उनले भनेका थिए ।

मोर्चा घोषणा तत्कालिन नेपाल कम्युनिष्ट पार्टी (नेकपा)कै स्वरुपमा पार्टी गठन गर्नेतिर लक्षितसमेत देखिन्छ । चार दल मिलेर तत्कालिन नेकपालाई ब्यूँताउने गरी लागेको अनुमान लगाउन सहज छ । योबीचमा नेताहरुका अभिव्यक्ति पनि नेकपा गठनलक्षित छ । यदि पार्टी एकता गर्नेगरी अगाडि बढे थप शक्ति आर्जन हुने पनि आकंलन गर्न सकिन्छ ।