हामी सबैकाे संसारन्यूज

काठमाडौं । बैंकिङ क्षेत्रमा निक्षेप बढ्दै जाँदा लगानीयोग्य तरलताको वृद्धि हुन थालेको छ । कर्जाको माग नबढ्दा भने अन्तरबैंक ब्याजदर घट्दै गएको छ । बैंकहरुमा निक्षेपको मात्रा निरन्तर बढ्दै जाँदा अन्तरबैंकको औसत ब्याजदर असार ५ गते ३.९ प्रतिशत हुन पुगेको छ ।

असार ३ गतेसम्मको तथ्यांकअनुसार बैंक तथा वित्तीय संस्थामा कुल निक्षेप ५५ खर्ब ७३ पुगेको थियो भने कर्जा लगानी भने ४८ खर्ब ५५ अर्ब पुगेको छ । गत आवको तुलनामा चालु आवमा बैंकहरुमा निक्षेप ४ खर्ब भन्दा बढी भएको छ ।

गत आवको असार मसान्तमा ५१ खर्ब ५९ अर्ब रहेको थियो । तर कर्जा लगानीको वृद्धि भने १ खर्ब ४१ अर्ब मात्रैले वृद्धि भएको छ । बैंकहरुमा निक्षेप बढेसँगै असार ३ गतेसम्म औसत कर्जा निक्षेप अनुपात (सिडी रेसियो) ८३.८८ प्रतिशतमा झर्न पुगेको छ ।

विदेशबाट आउने रेमिट्यान्सको आप्रवाहमा भएको सुधारले गर्दा बैंकिङ क्षेत्रको निक्षेपमा सकारात्मक अवस्था देखिएको हो । त्यस्तै मन्दीको प्रभावले उद्योग, बजार, उत्पादन क्षेत्र र उपभोग्य क्षेत्र आवश्यकताअनुसार चलायमान हुन नसक्दा कर्जा लगानीमा सुस्तता छाएको छ ।

मौद्रिक नीति मार्फत् नेपाल राष्ट्र बैंकले अन्तरबैंक ब्याजदरलाई नीतिगत दरभन्दा २ प्रतिशत बिन्दुले मात्रै तलमाथि हुनेगरी कायम गर्ने लक्ष्य लिएको छ । त्यस्तै, ७ प्रतिशत नीतिगत ब्याजदर, ५ प्र्रतिशत अन्तरबैंक ब्याजदर र अन्तरबैंक ब्याजदर ९ प्रतिशतभन्दा माथि पुग्दा प्रणालीमा तरलता पठाउने लक्ष्य केन्द्रीय बैंकले लिएको छ ।

प्रणालीमा लगानीयोग्य तरलता वृद्धि हुँदै जाँदा बैंकहरुले विकास ऋणपत्रको ब्याजदर घटाएका छन् । गत पुसमा १०.९३ प्रतिशत पुगेको विकास ऋणपत्रको ब्याजदर अहिले असार ४ सम्म आउँदा घटेर ६.९३ प्रतिशत कायम भएको छ । प्रणालीमा अधिक तरलता भए पनि दीर्घकालीन ऋणपत्रको ब्याजदर नै बैंकहरुले घटाएका हुन् ।