हामी सबैकाे संसारन्यूज

काठमाडौं । नेपाल टेलिकमले अत्याधुनिक दूरसञ्चार सेवाहरू उपलब्ध गराउने क्रममा मुलुकभरी एफटिटिएच सेवाको विस्तार तीव्ररूपमा गरिरहको जनाएको छ ।

यसका बाबजुद अझै पनि ग्राहकको मागबमोजिम केही स्थानमा यस सेवाको पहुँच स्थापित गर्नेक्रम जारी रहेको पनि टेलिकमले जनाएको छ ।

सेवाग्राहीको मागलाई मध्यनजर गर्दै यस सेवाको उपलब्धताका सम्बन्धमा निःशुल्क नम्बर १९८–१ (१९८ मा डायल गरी प्राप्त सन्देशपश्चात फेरि १ डायल गरी) मा डायल गरी ग्राहक सेवा केन्द्रका प्रतिनिधिमार्फत आवश्यक जानकारी प्राप्त गर्न एवं सेवाको माग दर्ता गर्न सकिने व्यवस्था मिलाइएको टेलिकमले जनाएको छ ।

सोमबारदेखि एफटिटिएच सेवा प्राप्त गर्न चाहने मुलुकभरीका सेवाग्राहीले १९८–१ डायल गरेर आफूलाई आवश्यक पर्ने सेवा र स्थानका बारेमा पहिले नै माग दर्ता गर्न सक्नेछन् । ती स्थानहरूमा कम्पनीले यथासम्भव छिटो एफटिटिएच जडान गर्नेछ ।

नेटवर्क नभएका स्थानमा सम्भव भएसम्म पूर्वाधार निर्माण गरी एफटिटिएच सेवा उपलब्ध गराउने छ । एफटिटिएच सेवामा एउटै फाइबरबाट टेलिफोन, तीव्र गतिको इन्टरनेट र टेलिभिजन सेवा उपलब्ध रहेको टेलिकमले जनाएको छ ।