हामी सबैकाे संसारन्यूज

काठमाडौं । कोशी प्रदेश सरकारबारे निर्णय लिन सत्ता गठबन्धनको बैठक बालुवाटारमा सुरु भएको छ । प्रधानमन्त्री निवास बालुवाटारमा सुरु भएको बैठकले कोशी प्रदेशमा नयाँ बन्ने सरकारबारे निर्णय लिनेछ ।

शुक्रबार प्रदेशसभामा विश्वासको मत माग्दै मुख्यमन्त्री हिक्मतकुमार कार्कीले राखेको प्रस्ताव प्रदेशसभाबाट बहुमत नपुगेसँगै अस्वीकृत भएको थियो ।

कार्की नेतृत्वको सरकारले विश्वासको मत नपाएसँगै प्रदेश प्रमुखले असार २१ सम्मको समय दिँदै नयाँ सरकार गठनका लागि आह्वान गरेका छन् । तर, प्रदेशमा नयाँ सरकारबारे दलहरुबीच सहमति नबनेसँगै केन्द्रको सत्ता गठबन्धनका दलहरु केन्द्रबाटै सहमति प्रयास थालेका हुन् ।

बालुवाटारमा जारी बैठकले प्रदेशमा शक्ति बाँडफाँटको विषयमा सहमती खोज्नेछ । अहिले कोशीमा कांग्रेस र माओवादी केन्द्र दुवैले सरकारको नेतृत्वमा दाबी गरेका छन् ।

कांग्रेसले प्रदेश सभापति समेत रहेका उद्धव थापालाई मुख्यमन्त्रीमा अघि सार्ने तयारी गरिरहेको छ भने संसदीय दलका नेता इन्द्र आङ्बोलाई अगाडि सार्ने तयारी गरेको छ ।

९३ सदस्यीय कोशी प्रदेशसभामा बहुमतका लागि ४७ प्रदेशसभा सदस्य चाहिन्छ । हालको सत्ता गठबन्धन एमालेसँग ४० र राप्रपासँग ६ गरी ४६ सदस्य छन् । दुई दललाई सरकार बनाउन थप एक सदस्यको आवश्यकता पर्दछ ।

यता, कांग्रेससँग २९, माओवादी केन्द्रसँग १२ (सभामुखबाहेक), एकीकृत समाजवादीसँग चार र जनता समाजवादीसँग एक गरी सभामुखबाहेक ४६ सांसद छन् । यस्तोमा बहुमत पुर्‍याउन दुवै पक्षलाई सकस छ । यदि दलहरुबीच सहमति नभए प्रदेशसभा मध्यावधीतर्फ नै जाने देखिन्छ ।