काठमाडौं । नेपाली कांग्रेसको केन्द्रीय समिति बैठक आज पनि बस्दैछ । बैठकको पाँचौं दिन आज पार्टी सभापति र महामन्त्रीद्वयले जवाफ दिने कार्यक्रम छ । केन्द्रीय सदस्यहरुले राखेको प्रश्नको जवाफ सभापति र महामन्त्रीद्वयले दिने कार्यक्रम छ ।
असार २ गतेदेखि जारी बैठकमा महामन्त्रीद्वले वार्षिक कार्ययोजना र १० बुँदे एजेण्डा प्रस्तुत गरेका थिए । बैठकमा विशेषगरी महामन्त्रीद्वय गगन थापा र विश्वप्रकाश शर्माको कार्यशैलीमाथि निकै प्रश्नहरु उठाइएको छ भने सभापति शेरबहादुर देउवाको पनि आलोचना भएको छ ।
यसअघि महामन्त्रीद्वयकै पक्षमा देखिएका नेताहरुले पनि महामन्त्रीद्वयको कार्यशैलीलाई लिएर आलोचना गरेका छन् । विशेषगरी संसदीय दलको नेताको विकल्प खोज्छौं भन्ने महामन्त्री थापाको भनाईको निकै आलोचना भएको छ । महामन्त्रीद्वयमाथि सभापतिलाई असहयोग गरेको, पार्टीलाई एकढिक्का बनाउने भन्दा गुटगट शैली अपनाएको जस्ता आरोप लगाएका छन् ।
कतिपय सदस्यले महामन्त्रीद्वयले राखेको प्रतिवेदनमाथि नै प्रश्न उठाएका छन् । प्रस्तुत प्रतिवेदन राजनीतिक खालको नभएको उनीहरुको टिप्पणी छ ।
यता, सभापति देउवामाथि पार्टी सञ्चालन विधि विधानअनुसार नगरेको आरोप लागेको छ । पार्टीभित्र मनमौजी गरिएको, भातृ संगठन भद्रगोल पारिएको जस्ता आरोप देउवामाथि लगाइएको छ ।
कतिपयले बैठकलाई फेसबुक लाइभमार्फत देखाएको विषयमा पनि आलोचना गरेका छन् ।
वि.सं.२०८० साउन ८ सोमवार १२:१८ मा प्रकाशित
