हामी सबैकाे संसारन्यूज

काठमाडौं । प्रभु क्यापिटलले अपांगता संरक्षण नेपालको सदस्यलाई शेयर बजार सचेतना एवं वित्तीय साक्षरता कार्यक्रम तालिम सञ्चालन गरेको छ । कम्पनीले बहिरा अपांगता भएका व्यक्तिहरुका लागि राष्ट्रिय सहकारी तथा व्यवस्थापन प्रशिक्षण केन्द्रको सहकार्यमा शेयर बजार सचेतना एवं वित्तिय साक्षरता कार्यक्रम संचालन गरेको हो ।

अपांगता संरक्षण नेपाल अन्तर्गत रहेका सदस्यहरुमध्ये २० भन्दा बढीको सहभागिता भएको कार्यक्रम मुख्यतया पुँजीबजारमा शुरुआती प्रवेश तथा लगानीको महत्वमा केन्द्रित थियो । कार्यक्रमको तालिम सञ्चालन प्रभु क्यापिटल लिमिटेडको मार्केटिंग एसोसिएट विनय अधिकारीले गरेका थिए । कार्यक्रम पुँजीबजारमा शुरुआती प्रवेश के-कसरी गर्ने ? मेरो शेयर के-कसरी चलाउने ? साथै कार्यक्रममा शेयरबजार सम्बन्धी सूचनाको स्रोतहरु आदि विषयमा सामूहिक रुपमा अन्तरक्रिया गरिएको हो ।

शारीरिक तथा मानसिक कमी-कमजोरी भई अपांगता भएका ‘क’ तथा ‘ख’ वर्गका अपांगता भएका व्यक्तिहरुलाई धितोपत्र बजार प्रवेशमा प्रोत्साहन गर्नका लागि प्रभु क्यापिटलमार्फत् डिम्याट तथा मेरो शेयर खोल्दा कुनै पनि शुल्क नलाग्ने तथा आजीवन सो सुविधा निःशुल्क पाउने व्यवस्था रहेको समेत उनले जानकारी दिए ।

प्रभु क्यापिटलले शेयर र लगानीमा सचेतना अभिवृद्धिका लागि समय-समयमा शेयर तथा पुँजीबजारसँग सम्बन्धित तालिम कार्यक्रम, विविध वर्कसप तथा सचेतना कार्यक्रमहरु सञ्चालन गर्दै आइरहेको छ ।