काठमाडौं । प्रतिनिधि सभाको बैठक आज बस्दैछ । संघीय संसद भवन नयाँ बानेश्वरमा दिउँसो १ बजे बस्नेगरी बैठक तय भएको संसद सचिवालयले जनाएको छ । पछिल्लोपटक गएको साउन २९ बसेर स्थागित भएको बैठक आज पुनः बस्न लागेको हो ।
२९ साउनमा बसेको संसद बैठक प्रमुख प्रतिपक्षी दल एमालेको अवरोधपछि कार्यसूचीमा प्रवेशै नगरी बैठक स्थगित भएको थियो । त्रिभुवन विमानस्थलबाट बाहिरिएपछि बरामद भएको ६१ किलो सुन प्रकरणको अनुसन्धान गर्न एमालेले उच्चस्तरीय छानबिन समिति बनाउनुपर्ने माग गर्दै आएको छ ।
सोही माग लाई आधार बनाएर एमालेले झण्डै एक महिनादेखि लगातार संसद बैठक अवरुद्ध गर्दै आएको छ । एमालेको विरोधको कारण गएको साउन १० गतेदेखि लगातार संसद बैठक कार्यसूचीमा अघि बढ्न सकेको छैन ।
संसद बैठक अवरुद्ध गर्ने एमालेको भूमिकाको चौतर्फी आलोचना हुँदै आएको छ ।
स्वयं एमाले उपाध्यक्षसमेत रहेका संविधानसभाका अध्यक्ष सुवास नेम्वाङलेसमेत संसद् अवरोध संविधानसम्मत र नियमसङ्गत नभएको बताएका छन् ।
आजको बैठकका लागि सभामुख देवराज घिमिरेले राष्ट्रपति कार्यालयबाट प्राप्त कार्यभार तोकिएको र विधेयक प्रमाणीकरण सम्बन्धी पत्रहरूको व्यहोरा पढेर सुनाउनेसहित विभिन्न ८ वटा सम्भावित कार्यसूची तय भएका छन् ।
यसअघि प्रधानमन्त्री पुष्पकमल दाहाल ‘प्रचण्ड’ र सभामुख घिमिरेबिच संसदको अवरोध हटाउने सम्बन्धी भेटवार्ता समेत भएको थियो ।
वि.सं.२०८० भदौ ३ आइतवार ०९:११ मा प्रकाशित






























