हामी सबैकाे संसारन्यूज

काठमाडौं । लामो समयदेखि अवरुद्ध संसद सुचारु गराउनका लागि सिंहदरबारमा राष्ट्रिय दलहरुको बैठक सुरु भएको छ ।

प्रधानमन्त्री कार्यालय सिंहदरबारमा सुरु भएको उक्त बैठकमा नेपाली कांग्रेस, नेकपा एमाले, माओवादी केन्द्र राष्ट्रिय स्वतन्त्र पार्टी र राष्ट्रिय प्रजातन्त्र पार्टी, जनता समाजवादी पार्टीका नेताहरु सहभागी रहेका छन् ।

बैठकमा गत साउन ३ गते त्रिभुवन अन्तराष्ट्रिय विमानस्थलबाहिरबाट बरामद ६० किलो सुन तस्करी छानविनको अनुसन्धान गर्नका लागि गठन गरिने उच्चस्तरीय छानविन समितिको विषयमा छलफल गरिने बताइएको छ ।

सुन तस्करी छानविनका लागि उच्चस्तरीय छानविन समिति बनाउन माग गर्दै संसदमा प्रमुख प्रतिपक्षी रहेको नेकपा एमालेले साउन १० गतेदेखि प्रतिनिधि सभा तथा राष्ट्रिय सभाको बैठकमा अवरुद्ध गर्दै आएको छ ।

यसअघि सुन तस्करी प्रकरणमा सिआइबीलाई छानविन गर्ने अनुमति दिएको सरकारले राज्यका प्रमुख सुरक्षा अंगलाई विश्वास गर्नुपर्ने र अनुसन्धानमा सबै पक्षले सघाउनु पर्ने बताउँदै आएको थियो । अन्तत सोमबार राति बसेको दलहरुको बैठकले एमालेको माग अनुसार छानविन समिति गठन गर्ने विषयमा सहमति जुटाउँदै त्यसका लागि तीन सदस्यीय कार्यदल समेत बनाएको थियो ।

एमालेका उपाध्यक्ष सुवास नेम्वाङ, नेपाली कांग्रेसका प्रमुख सचेतक रमेश लेखक र नेकपा माओवादीका प्रमुख सचेतक हिरतराज पाण्डे रहेको कार्य दलले मंगलबार छानविन समिति गठनका लागि मस्यौदा तयार गरेर दलहरु समक्ष पेश गरेका थिए ।