Sansar News
काठमाडौं । श्रम गन्तव्य सुरक्षित बनाउन र मानव तस्करी रोक्न प्रधानमन्त्री पुष्पकमल दाहाल ‘प्रचण्ड’ले नेपालका श्रम गन्तव्य देशका राजदूत र नियोग प्रमुखसँग छलफल गर्ने भएका छन् ।
प्रधानमन्त्रीले विदेशस्थित नेपाली दूतावास तथा कूटनीतिक नियोगका प्रतिनिधिलाई काठमाडौं बोलाएका हुन् ।
प्रधानमन्त्री दाहालले कूटनीतिक नियोगका प्रतिनिधिलाई सहभागी गराई दुई दिवसीय बैठक आयोजना गर्न लागेका हुन् । बैठक आगामी मंगलबार र बुधबार प्रधानमन्त्री तथा मन्त्रिपरिषद्को कार्यालय सिंहदरबारमा चल्नेछ ।
यसप्रकारको बैठक प्रधानमन्त्रीको पहलमा देशमा पहिलोपटक हुँदै छ । प्रधानमन्त्री दाहालकै अध्यक्षतामा हुने बैठकमा श्रम आप्रवासनका सवाल र कूटनीतिक नियोगको भूमिकाका विषयमा छलफल हुने प्रधानमन्त्रीको सचिवालयले जनाएको छ ।
वि.सं.२०८० भदौ २५ सोमवार ०७:३३ मा प्रकाशित
