Sansar News
काठमाडौं । देशभरका शिक्षकहरु स्कुल बन्द गरेर काठमाडौंको माइतीघर केन्द्रीत आन्दोलनमा सहभागी भएका छन् ।
सरकारले संसद्मा दर्ता गराएको ‘विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयक– २०८०’ विरुद्ध देशभरीबाट हजारौ शिक्षकहरु स्कुलमा पठनपाठन ठप्प पारेर काठमाडौंका सडकमा उत्रिएका हुन् ।
सरकारले शिक्षकहरुको हकहित विरोधी विधेयक ल्याएको भन्दै विरोध गर्दै आएका उनीहरु मंगलबारका लागि वार्तामा सरकारले बोलाए पनि त्यसलाई अस्वीकार गरेका उनीहरु सिंहदरबार केन्द्रीत आन्दोलनमा उत्रिएका हुन् ।
नेपाल शिक्षक महासंघको नेतृत्वमा सुरु भएको उक्त आन्दोलनमा देशभरीका सामुदायिक, संस्थागत, नीजी तथा आवासीय विद्यालयका शिक्षकहरुको समेत सहभागीता रहेको छ ।
देशैभरी रहेका ३४ हजार विद्यालयका २ लाख भन्दा बढी शिक्षकहरु आन्दोलनमा उत्रिएपछि झण्डै ७० लाख विद्यार्थीको पठनपाठन प्रभावित भएको छ । आन्दोलनमा सहभागी नभएका केही शिक्षकहरु विद्यालयमा हाजिर भएपनि पेन डाउन गरेर पठन पाठन ठप्प पारिएको छ ।
वि.सं.२०८० असोज ३ बुधवार १२:५५ मा प्रकाशित
