हामी सबैकाे संसारन्यूज

काठमाडौं । निर्वाचन आयोगले आयोगमा दर्ता भएका दलहरुलाई १५ बुँदे निर्देशन दिएको छ ।

बिहीबार बसेको आयोगको बैठकले राजनीतिक दल सम्बन्धी ऐन, २०७३ को दफा ५७ बमोजिम पार्टी कमिटी, पद, पदाधिकारी हेरफेर सदस्यता लगायतका विषयमा निर्देशन दिएको हो ।

आयोगका उपसचिव एवम् सहायक प्रवक्ता डा. थानेश्वर भुसालले जारी गरेको विज्ञप्तिमा भनिएको छ, ‘दलले आफ्नो नाम, विधान, नियम, छाप, झण्डा वा चिन्हमा भएको परिवर्तन वा संशोधन वा पदाधिकारीको हेरफेर भएका विषयको जानकारी राजनीतिक दल सम्बन्धी ऐन, २०७३ को दफा ५१ बमोजिम ३० दिन भित्र आयोगलाई दिने ।’

त्यस्तै बुँदा नम्बर ९ मा दलले आफ्नो वास्तविक हिसाव किताब देखिने गरी राजनीतिक दल सम्बन्धी ऐन २०७३ को दफा ४० बमोजिम आयोगले तोकेको ढाँचामा लेखा राखी अभिलेख राख्ने प्रयोजनको लागि दलले जिम्मेवार पदाधिकारी तोकी त्यसको जानकारी आयोगलाई गराउने साथै दलले आफ्नो आय/व्ययको वास्तविक हिसाब किताब देखिने गरी बैंकमार्फत् कारोबार गर्ने व्यवस्था मिलाउन समेत निर्देशन गरेको छ ।