Sansar News
काठमाडौं । नेकपा एमाले कैलालीको नयाँ नेतृत्व चयनका लागि आज मतदान भइरहेको छ ।
सुखडमा रहेको घोडाघोडी बहुमुखी क्याम्पसको सभाहलमा मतदान भएको हो । मतदान दिउँसो १ बजेसम्म चल्ने बताइएको छ ।
कार्यवाहक अध्यक्ष दुर्गाप्रसाद जोशी, सचिव डेजी पाण्डे र पूर्व प्रदेश सचिवालय सदस्य यज्ञराज ढुंगाना प्यानलसहित एमालेको नेतृत्वका लागि प्रतिस्पर्धामा छन् ।
अध्यक्षका प्रत्यासी डेजी पाण्डेले पहिलो मत खसालेका हुन् । यो निर्वाचनमा पाँच सय ९१ जना प्रतिनिधिले मतदान गर्नेछन् ।
फागुन ६ गते एमाले अध्यक्ष केपी शर्मा ओलीले घोडाघोडीको सुखडमा नवौँ अधिवेशनको उदघाटन गरेका थिए । ओलीले नेतृत्वमा सहमति नजुटे भोलिपल्टै निर्वाचन प्रक्रिया अघि बढाउन निर्देशन दिएका थिए ।
वि.सं.२०८० फागुन ११ शुक्रवार ११:१९ मा प्रकाशित
