हामी सबैकाे संसारन्यूज

काठमाडौं । पछिल्ला समयमा देशमा देखिएको आर्थिक समस्याका कारण उत्पन्न समस्या र प्रविधिको अधिकतम प्रयोगका कारण नेपालीहरुमा मानसिक समस्याा बढ्दै गएकोप्रति ध्यानाकर्षण गराइएको छ ।

आइतबारको प्रतिनिधि सभा बैठकमा सांसद सुनिता बरालले यसप्रति ध्यानाकर्षण गराउँदै सरकारले नागरिकको मानसिक समस्याप्रति चासो नदिएको बताएकी हुन् ।

केही दिनअघि ललितपुरमा एक महिलाले आफ्ना छोराछोरीको हत्या गरेर आत्महत्या गरेको र काठमाडौंको सितापाइलामा एक पुरुषले श्रीमती छोरी, र नातिनिको हत्या गरेर आफुले पनि आत्महत्या गरेको घटनाको उदाहरण दिँदै पछिल्ला दिनमा नागरिकहरुमा विभिन्न कारणले मानसिक समस्या बढिरहेको र सरकाले त्यसमा चासो नदिएको गुनासो गरिन् ।

‘आत्महत्याको दर असाध्यै अत्यासलाग्दो गरि बढिरहेको छ । डिप्रेशनका कारण बढेका अपराध र आत्महत्याको अवस्था बढेकोतर्फ हामीले विशेष ध्यान दिन जरुरी छ,’ उनले भनिन् ।

उनले ४० सालमा सरकारी तवरबाट ४० बेडका मानसिक अस्पताल खुलेपनि त्यसपछि यस्ता अस्पताल नखुलेको र मानसिक स्वास्थ्यमा सरकारको प्राथमिकता नदेखिएको बताउँदै उनले दिनदिनै मानसिक स्वास्थ्य समस्या बढिरहेको समेत बताइन् ।

‘सूचना प्रविधिका कारण निम्तिएका धेरै समस्या तथा कोभिडपछि सिर्जना भएका अवस्थाहरु र पछिल्ला अवस्थामा आर्थिक असहजताले निम्त्याएका अनेक व्यवहारिक र सामाजिक समस्याहरुका कारण मानसिक समस्या ज्याँदै बढेको छ ।’ उनले भनिन् ।

मानसिक स्वास्थ्य रणनीति र कार्यनीति २०७७ ले निर्धारण गरेका काम गर्न र यसलाई समेत समेटेर थप रणनीति बनाउन आवस्यक रहेको उनले भनिन् ।