Sansar News
जेरुसेलम । इजरायली विपक्षी नेता याइर लापिडले प्रधानमन्त्री बेन्जामिन नेतान्याहुले युद्धविराम र बन्धक मुक्त गर्ने सम्झौता अघि बढाएमा समर्थन गर्ने बताएका छन् ।
अमेरिकी राष्ट्रपति जो बाइडनले गाजा पट्टीमा हमास लडाकूले बन्धक बनाएका व्यक्तिहरूलाई रिहा गर्नेलगायत पूर्ण युद्धविरामका लागि इजरायलले नयाँ योजना प्रस्तुत गरेको बताए ।
नेतन्याहूका अति दक्षिणपन्थी गठबन्धन साझेदारहरू राष्ट्रिय सुरक्षा मन्त्री इतामार बेन गभिर र अर्थमन्त्री बेजालेल स्मोटरिचले यसअघि हमासको विनाश बिना नै युद्ध समाप्त भएमा आफ्नो सरकार ढाल्ने धम्की दिएका थिए ।
लापिडले सामाजिक सञ्जाल एक्समा लेख्नुभएको छ, “यदि इटामर बेन ग्विर र स्मोटरिचले सरकार छोडेमा बन्धक सम्झौताका लागि नेतन्याहूलाई हाम्रो समर्थन रहनेछ ।”
“इजरायली सरकारले राष्ट्रपति बाइडेनको महत्वपूर्ण भाषणलाई नजरअन्दाज गर्न सक्दैन,” लापिडले भने ।
“टेबलमा सम्झौताको प्रष्ट खाका छ र सरकारले यसलाई मान्नुपर्छ,” उहाँले भने ।
नेतन्याहूले हमासको विनाश बाइडेनले अघि सारेको इजरायली योजनाको हिस्सा भएको बताएका छन् ।
इजरायली सरकारी तथ्याङ्कमा आधारित विवरणअनुसार अक्टोबर ७ मा हमासले दक्षिणी इजरायलमा गरेको अकल्पनीय आक्रमणका कारण गाजा युद्ध सुरु भएको थियो, जसमा एक हजार १८९ व्यक्तिको मृत्यु भएको थियो ।
लडाकूहरूले २५२ जनालाई बन्धक बनाएका थिए भने तीमध्ये १२१ जना गाजामा रहेका छन् । गाजामा रहेका बन्धकमध्ये पनि ३७ जनाको मृत्यु भइसकेको सेनाले जनाएको छ ।
गाजा पट्टीमा गत अक्टोबर ७ यता इजरायली हवाइ आक्रमण र स्थल आक्रमणमा कम्तीमा ३६ हजार ३७९ प्यालेस्टिनी मारिएका छन् । (रासस÷एएफपी)
वि.सं.२०८१ जेठ २० आइतवार ०७:३४ मा प्रकाशित
