हामी सबैकाे संसारन्यूज

सिराहा । जिल्ला प्रहरी कार्यालय, सिराहाको शौचालयमा मृत भेटिएकी प्रहरी जवानका केटा साथी पक्राउ परेका छन् । गत जेठ ३१ गते २५ वर्षीया प्रहरी जवान करिश्मा सुनार कार्यालयको महिला बालबालिका तथा ज्येष्ठ नागरिक सेवा केन्द्र भवनको दोस्रो तलामा रहेको शौचालयमा झुण्डिएको अवस्थामा मृत भेटिएकी थिइन् ।

सोही घटनामा आत्महत्या दुरुत्साहनको आरोपमा दैलेख घर भई बाँके बैजनाथ गाउँपालिका–२ बस्ने २७ वर्षीय पुष्कर थापा मगरलाई प्रहरीले पक्राउ गरेको हो ।

मृतक महिला प्रहरीको मोबाइलमा फेला परेका म्यासेजका आधारमा उनलाई पक्राउ गरी अनुसन्धान अघि बढाइएको जिल्ला प्रहरी कार्यालय सिराहाका प्रहरी निरीक्षक उदय द्विवेदीले जानकारी दिए ।

‘उहाँहरूको बिचमा विवाद भएका म्यासेजहरू फेला परे । मृतकका परिवारले पनि उहाँ विरुद्ध जाहेरी दिनुभयो । त्यसैका आधारमा अदालतबाट सात दिनको म्याद लिएर आत्महत्या दुरुत्साहनको आरोपमा अनुसन्धान गरिरहेका छौँ’, प्रहरी निरीक्षक द्विवेदीले भने ।