Sansar News
बुटवल । लुम्बिनी प्रदेशमा नेकपा एमाले नेता चेतनारायण आचार्य मुख्यमन्त्री हुने भएका छन् । सोमबार बिहान एमाले केन्द्रको निर्देशनपछि आचार्य मुख्यमन्त्री बन्ने निश्चित भएको हो ।
विशेष स्रोतका अनुसार आचार्यलाई मुख्यमन्त्री बनाउन बिहान मात्रै एमाले अध्यक्ष केपी शर्मा ओलीले निर्देशन दिएका थिए । यसअघि काँग्रेस–एमालेबिच दलका नेता लीला गिरीलाई मुख्यमन्त्री बनाउने सहमति भएको थियो ।
अर्घाखाँची निर्वाचन क्षेत्र १ (१) बाट निर्वाचित आचार्य यसअघि माओवादीका जोखबहादुर महरा नेतृत्वको सरकारमा आर्थिक मामिला तथा योजना मन्त्री थिए । आचार्य एमाले लुम्बिनी संसदीय दलका उपनेता हुन् ।
यता पार्टी अध्यक्ष केपी शर्मा ओलीले आचार्यलाई मुख्यमन्त्री बनाउन ठाडो निर्देशन दिएपछि संसदीय दलका नेता लीला गिरी फायर भएका छन् ।
गिरीले नेकपा एमाले संसदीय मूल्य र मान्यता विपरीत गएको समेत आरोप लगाएका छन् । अध्यक्ष ओलीको निर्देशनले इमानदार कार्यकर्तामा अन्यायमा परेको समेत बताए ।
वि.सं.२०८१ साउन ७ सोमवार १४:०२ मा प्रकाशित
