Sansar News
स्याङ्जा । स्याङ्जाको गल्याङमा प्रथम गल्याङ प्रिमियर लिग (जिपिएल) हुने भएको छ । गल्याङ क्रिकेट सङ्घले गल्याङ बजारमा पत्रकार सम्मेलन गरी प्रिमियर लिग हुने जानकारी गरेको हो ।
संस्थाका उपाध्यक्ष एवं खेल संयोजक खगेन्द्र भण्डारीले टी २० फम्र्याटमा क्रिकेट प्रतियोगिता आयोजना गर्न लागिएको बताए । उनले यो प्रतियोगिताले जिल्लाको क्रिकेट इतिहास रच्ने दाबी गरे ।
प्रतियोगितामा गल्याङ नगरपालिका अन्तरगतका आठ समूहको सहभागिता रहनेछ । गल्याङ प्रिमियर लिग भदौ १ गतेबाट सुरु हुनेछ ।
बर्खाको समयमा खेल प्रभावित नहोस् भन्नका लागी तीन ठाउँमा खेल मैदान छनोट गरिएको संस्थाका सचिव अमृत खनालले बताए । उनका अनुसार मालुङ्गा खेल मैदान, दिमिक क्रिकेट मैदान र असेर्दीमा खेल हुने छ ।
प्रतियोगिताको विजेताले एक लाख र उपविजेताले ५० हजार रुपैयाँ पुरस्कार प्राप्त गर्नेछ ।
वि.सं.२०८१ साउन १५ मंगलवार ११:०१ मा प्रकाशित
