काठमाडौँ । कालिकोटको महाबै गाउँपालिका-२, गैराखाडामा रहेको तिला माध्यमिक विद्यालयमा विद्यालयले कोरियन भाषा पढाउने भएको छ । कक्षा ११ र १२ का विद्यार्थीका लागि कोरियन भाषा पढाउन लागिएको विद्यालयले जनाएको छ । विद्यालयले व्यवस्थापनतर्फ ऐच्छिक विषयका रूपमा कोरियन भाषा पढाउने निर्णय गरेको हो ।
सामाजिक सञ्जालमा विद्यालयमा कोरियन भाषा पढाउन लागेको भन्दै विद्यालयको चर्को आलोचना भएको छ । तर, विद्यार्थी र समयको माग अनुसार कोरियन भाषालाई समावेश गर्न लागिएको विद्यालयका एक कर्मचारीले बताए ।
‘पाठ्यक्रममै भएको विषय हामीले पढाउँदै छौँ, व्यवस्थापन तर्फ ऐच्छिक तेस्रो विषय हो । जुन एक सय पूर्णाङ्कको हुन्छ । ती कर्मचारीले भने, सामाजिक सञ्जालमा आलोचना भएपनि यो विषय पढ्नेहरूको सङ्ख्या ठुलो छ ।
विद्यालयले ४० जना विद्यार्थीलाई पढाउने लक्ष्य लिएको छ । ‘सुरुमा शिक्षकका लागि दर्खास्त आह्वान गरेका हौँ । केही दिनमा विद्यार्थी भर्ना सम्बन्धी सूचना जारी गर्दैछौँँ ।’ उनले भने, ‘कोरियन भाषा पढाउने शिक्षकको दर्खास्त आह्वानसँगै भर्ना हुने विद्यार्थीहरूको सङ्ख्या ह्वात्तै बढेको छ ।’
तिला गाउँपालिकाका अध्यक्ष खेम सिंहले यहाँका स्थानीय विद्यालयमा कोरियन भाषा पढाइ हुँदा सहरमा गएर महँगो पैसा तिरेर पढ्नु पर्ने यहाँका नागरिकको बाध्यता अन्त्य हुने बताए । उनले यहाँ भाषा पढेर कोरिया जानेहरूलाई पढ्न र रोजगारका लागि राम्रो अवसर हुने बताए ।
वि.सं.२०८१ साउन ३१ बिहीवार १०:४८ मा प्रकाशित
