काठमाडौँ । लुम्बिनी प्रदेशका मुख्यमन्त्री चेतनारायण आचार्यले आज विश्वासको मत लिँदैछन् । साउन ७ गते मुख्यमन्त्री नियुक्त भएका आचार्यले आज दिउँसो १ बजे बस्ने प्रदेशसभाको बैठकमा विश्वासको मत लिन लागेका हुन् ।
मुख्यमन्त्री नियुक्त भएको ३० दिनभित्र विश्वासको मत लिइसक्नुपर्ने संवैधानिक व्यवस्था छ । सोही व्यवस्था अनुसार आज दिउँसो १ बजे बस्ने प्रदेशसभा बैठकमा मुख्यमन्त्री आचार्यले विश्वासको मत लिने कार्यसूची छ ।
आचार्य कांग्रेसका २७ र एमालेका २९ गरी ५६ जना सांसदको समर्थनमा मुख्यमन्त्रीमा नियुक्त भएका थिए । ८७ सांसद रहेको लुम्बिनी प्रदेशसभामा आवश्यक बहुमतको लागि ४४ सांसद चाहिन्छ ।
उनलाई एमाले, कांग्रेस, नागरिक उन्मुक्ति, लोकतान्त्रिक समाजवादी, जनमत, जनता समाजवादी, जनता समाजवादी नेपाल पार्टी र एक स्वतन्त्र प्रदेश सभा सदस्यले विश्वासको मत दिने भएका छन् ।
प्रदेश सभामा एमालेका २९, कांग्रेसका २७, नागरिक उन्मुक्तिका ४, लोसपा र जनमतका ३÷३, जसपाका २, जसपा नेपालका एक र स्वतन्त्र प्रदेश सभा सदस्य खड्ग बस्नेत छन् ।
वि.सं.२०८१ भदौ ४ मंगलवार ११:३२ मा प्रकाशित
