हामी सबैकाे संसारन्यूज

अमेरिका । अमेरिकामा २२ दिनदेखि वेपत्ता रहेको भनिएकी ममता काफ्लेको हत्या गरेर शव लुकाएको अभियोगमा उनका पति नरेश भट्ट पक्राउ परेका छन् ।

अमेरिकाको भर्जिनिया राज्यको मनासस सहरबाट गत अगस्त १ देखि हराएकी भनिएकी नेपाली मुलकी नर्स ममता काफ्ले भट्टको हत्या आरोपमा उनकै श्रीमान नरेश भट्टलाई अमेरिकी प्रहरीले बिहीबार पक्राउ गरेको हो ।

भट्टमाथि श्रीमतीको हत्या गरेर शव लुकाएको आरोपमा पक्राउ गरिएको हो ।। साथै उनलाई शव लुकाएर प्रमाण मेटाउने प्रयास गरेको लगायतका अभियोग लगाइएको छ ।

मनासस पार्क प्रहरी विभागले गरेको पत्रकार सम्मेलनका क्रममा जारी बिज्ञप्तिमा प्रिन्स विलियम काउन्टी, मनासास शहर र मनासस पार्कका शहरका लागि निर्वाचित राष्ट्रमण्डल (कमनवेल्थ ) अधिवक्ता एमी आश्वर्थ सहित मनासस पार्क प्रहरी विभागका प्रमुख मारियो लुगोले नरेश भट्टलाई मृत शरीर लुकाउने विरुद्धको अपराधको आरोपमा पक्राउ गरेको गरेको उल्लेख गरिएको छ ।

उनलाई भर्जिनिया नियमावली, संशोधित १९५० को धारा १८.२ –३२३.०२ को आरोपमा दोषी प्रमाणित नभएसम्म भट्ट निर्दोष मानिने छन् ।

मनसास पार्क प्रहरी विभागका अनुसन्धानकर्ताहरुले २७ जुलाई, २०२४ मा अन्तिम पटक देखिएकी २८ वर्षीया ममता काफ्ले भट्ट बेपत्ताको बारेमा सक्रिय रूपमा अनुसन्धान गरिरहेको उक्त बिज्ञप्तिमा जनाईएको छ ।

अगस्त २१, २०२४ मा अनुसन्धानकर्ताहरुले ममताको निवासको लागि खोजी वारेन्ट कार्यान्वयन गरेको र प्रिन्स विलियम काउन्टी प्रहरी विभाग फोरेन्सिक इकाईलाई खोजीमा सहयोग गर्न अनुरोध गरेको उल्लेख गरेको छ ।

खोजीको क्रममा उनीहरुले थप प्रमाणहरू प्राप्त गरेको समेत बिज्ञप्तिमा भनिएको छ । राष्ट्रमण्डलको सरकारी वकिलको कार्यालयसँगको परामर्शपछि गुप्तचरहरूले नरेश भट्टलाई बेपत्ता गरेकोे आरोपमा पक्राउ गरेको हो ।

ममताकी छोरीलाई समाज सेवा विभागमा राखिएको बिज्ञप्तिमा बताईएको छ । बेपत्ता ममता काफ्ले भट्टको मनसास पार्क प्रहरी विभागले अझै अनुसन्धान गरिरहेको र उनको खोजी भइरहेको उक्त बिज्ञप्तिमा उल्लेख गरेको छ ।