Sansar News
अमेरिका । नेपाली हिन्दु नारीहरुको महान पवित्र पर्व हरितालिका तीजको अवसर पारेर अमेरिकामा संयुत्त, रुपमा दर कार्यक्रमको आयोजना गरिएको छ ।
गैरआवासीय नेपाली संघ राष्ट्रिय समन्वय परिषद् अमेरिका, न्युयोर्क च्याप्टरले फ्रेण्डस् अफ नुवाकोट इन् न्युयोर्क अमेरिका, बाग्लुङ सेवा समाज अमेरिका, प्रवासी नेपाली एकता मञ्च, नेपाली अमेरिकन कलाकार संघ,धादिङ नेपाली समाज अमेरिका र काभ्रे अमेरिका कल्याणकारी समाज समाजसँगको सहकार्यमा संयुक्त तीज दरखाने कार्यक्रम सम्पन्न गरेको हो ।
गत आइतबार सेप्टेम्बर १ तारिख साँझ ६ बजेदेखि १२ बजेसम्म दिव्यधाम मन्दिरमा यो कार्यक्रम सम्पन्न भएको थियो । कार्यक्रममा १५ सय भन्दा बढी महिला दिदीबहिनीहरुको सहभागिता रहेको थियो ।
न्युयोर्कमा बर्षेनि मनाउँदै आइरहेको अमेरिकाको सबैभन्दा ठुलो तीज कार्यक्रम यस वर्ष पनि एनआरएनए न्युयोर्क च्याप्टरको तर्फबाट महिला उपाध्यक्ष लक्ष्मी थापाको संयोजनमा सम्पन्न गरिएको हो । यस वर्षको कार्यक्रममा दिदीबहिनीहरूको बृहत् उपस्थितिले दिव्यधाम मन्दिरको बेसमेंट र मन्दिरको हल भरिभराउ साथै ऐतिहासिक बनेको थियो ।
तीजको नाचगान, दर खुवाउने र शुभकामना आदानप्रदान भएकोले छोटो औपचारिक कार्यक्रमको अध्यक्षता एनआरएनए न्युयोर्क च्याप्टरको कार्यवाहक अध्यक्ष एवं उपाध्यक्ष छिरिङ शेर्पाले गरेका थिए भने प्रमुख अतिथिको रूपमा उपस्थित भई उपवाणिज्यदूत श्रीमती संगीता न्यौपानेले कार्यक्रमा उपस्थित सबै आमा तथा दिदीबहिनीलाई शुभकामना दिएकी थिइन् ।
औपचारिक कार्यक्रमको संचालन महिला सचिव गीता अधिकारीको रहेको थियो भने तीज कार्यक्रमको आर्थिक संयोजकमा कोषाध्यक्ष देवेन्द्र लामा रहेका थिए ।
सो अवसरमा हरितालिका तीज नारीहरूको पवित्र पर्वको अवसर पारेर कार्यक्रममा केही सामाजिक व्यक्तित्वहरूलाई सम्मान गरिएको थियो । त्यसैगरि कार्यक्रममा भाइबहिनीहरूले नृत्यका साथ समाजको अहिलेको जल्दोबल्दो घटनालाई लिएर जीवन्त अभिनय गरेका थिए ।
वि.सं.२०८१ भदौ २१ शुक्रवार ०९:४६ मा प्रकाशित
