नवलपुर । देवचुली नगरपालिका नवलपरासी बर्दघाट सुस्ता पूर्वमा अबदेखि पलाष्टिकजन्य फूल गुच्छा तथा माला प्रयोग गर्न नपाइने भएको छ ।
देवचुली नगरपालिकाका नगरप्रमुख हरिप्रसाद न्यौपानेका अनुसार नगरपालिकाले एक सूचना प्रकाशन गर्दै मुख्य चाडहरू विजया दशमी, दीपावली, छठ लगायत विभिन्न महोत्सव तथा समारोहका साथै पाहुनाको स्वागत एवम् बिदाइ कार्यक्रममा पलाष्टिकजन्य फूल गुच्छा, माला लगायतका सामाग्रीहरूको प्रयोग, आयत, बिक्री वितरण र भण्डारण नगर्न नगराउन अनुरोध गरेको छ ।
पलाष्टिक जन्य मालाको प्रयोगले वातावरणीय प्रदूषणका साथै मानव स्वास्थ्यमा समेत प्रतिकूल असर पार्ने, स्थानीय कृषकबाट उत्पादित फूलले बजार नपाउने साथै ठुलो धनराशि बाहिरिने जस्ता समस्याहरू देखिने प्रमुख प्रशासकीय अधिकृत मुकुन्द शर्माले जानकारी गराए । उनले नगर भित्रका कृषकहरूले उत्पादन गरेका सयपत्री, गोदावरी, मखमली लगायतका प्राकृतिक फूलहरू एवम् सो बाट बनेका मालाहरू मात्र प्रयोग गर्न अनुरोध गरे ।
अधिकृत शर्माले पलाष्टिकजन्य फूल तथा मालाहरू प्रयोग एवम् बिक्री वितरण गरेको पाइएमा उक्त सामानहरू नगरपालिकाबाट जफत हुने र कानुन अनुसार जरिवाना गरिने बताए ।
वि.सं.२०८१ भदौ ३१ सोमवार १३:११ मा प्रकाशित
