Sansar News
काठमाडौँ । सर्वोच्च अदालतका उपरजिस्ट्रार एवं सहायक प्रवक्ता गोविन्द घिमिरेले आफ्नो सुरक्षाका लागि सरकार आग्रह गरेका छन् ।पछिल्लो समय अदालतको अवहेलनामा दोषी ठहर भएका राजकुमार तिमल्सिनाले लगातार अज्ञात नम्बरबाट फोन गरेर धम्की दिएको भन्दै घिमिरेले आफ्नो सुरक्षाको माग गरेका हुन् ।
पछिल्लोपल्ट सिधाकुरा प्रकरणमा विवादित अडिओलाई लिएर अदालतको अवहेलना मुद्दा अघि बढाउने प्रयोजनका लागि घिमिरेले प्रतिवेदन तयार पारेका थिए । सोही विषयलाई लिएर तिमल्सिनाले आफुलाई भारतीय नम्बरबाट फोन गरेर बेला बेला धम्की दिएको भन्दै घिमिरेले सामाजिक सञ्जालमार्फत आफ्नो सुरक्षाका लागि सरकारको ध्यानाकर्षण गराएका हुन् ।
राजकुमार तिमल्सिनाले उपलब्ध गराएको अडिओमा आधारित सामग्री प्रकाशन र प्रसारण गरेवापत सिधाकुरा डट कमका दुई पत्रकार एक साता कैद बसिसकेका छन् । उनीहरुलाई ३ महिनाको कैद सजाय सुनाइएको भए पनि माफी मागेका कारण एक सातामै रिहा भएका हुन् ।
सोही मुद्दामा सर्वोच्चको ९ न्यायाधीश सम्मिलित बृहत् पूर्ण इजलासले तिमल्सिनालाई ६ महिना कैद सजाय सुनाएको छ । उनलाई माफी माग्ने अवसर पनि दिइएको छैन । रकम तिरेर कैदबाहिर बस्ने सुविधा पनि उनले नपाउने गरी सर्वोच्चले असोज १३ गते फैसला सुनाएको छ । उनी हाल फरार छन् ।
वि.सं.२०८१ कात्तिक १ बिहीवार ११:४६ मा प्रकाशित
