हामी सबैकाे संसारन्यूज

काठमाडौँ । सरकारको नेतृत्व गरिरहेको नेकपा एमालेले आगामी मङ्सिर ७ गते काठमाडौँमा जनप्रदर्शन गर्ने भएको छ । अराजकताविरुद्ध सामाजिक सद्भाव, राष्ट्रिय एकता र राजनीतिक स्थिरताको सन्देश दिन भन्दै एमालेले शक्ति प्रदर्शन गर्न लागेको सचिव पद्मा कुमारी अर्याले जानकारी दिइन् ।

प्रमुख प्रतिपक्ष दल नेकपा माओवादी केन्द्रले कार्तिक १० गते उपत्यकाको पार्टी शक्तिलाई सडकमा उतारेर सरकारविरुद्ध खबरदारी सभा आयोजना गरेको थियो । उता राष्ट्रिय स्वतन्त्र पार्टी रास्वपाका कार्यकर्ता सभापति रबि लामिछाने सहकारी ठगीको आरोपमा पक्राउ परेयता निरन्तर प्रदर्शनमा छ ।सरकारको नेतृत्व गरिरहेको पार्टी सडकमा गएर शक्ति प्रदर्शन गर्न खोज्नुलाई अनौठो रूपमा लिइएको छ ।

मङ्सिर ७ गते आयोजना गर्ने भनिएको जागरण सभामा काठमाडौँ, भक्तपुर र ललितपुरको शक्ति प्रदर्शन  गर्ने आइतबारदेखि एमालेले तयारी थालेको छ । तयारीमा तीन जिल्लाका जनसङ्गठन र सम्पर्क मञ्च पनि परिचालित हुँदै छन् । सचिव अर्यालले प्रदर्शन कुनै दल वा व्यक्ति विशेष विरुद्ध नभएको जिकिर गरिन् ।

प्रतिपक्षमा रहेका दुई ठुला दलहरूले भ्रष्टाचार र सुशासनको मुद्दामा सरकारमाथि सार्वजनिक रूपमा दबाब बढाएपछि त्यसको स्पष्टीकरण दिने मनसायले एमालेले शक्ति प्रदर्शन गर्न लागेको कतिपयको बुझिएको छ ।