Sansar News
काठमाडौँ । पछिल्लो समय उधारोमा चेक कारोबार गरेर कालोसूचीमा पर्नेको संख्या बढ्दै गएको छ । चालु आवको कात्तिकसम्ममा ११ हजार पाँच सयभन्दा बढी चेक बाउन्स भएर कालोसूचीमा परेको कर्जा सूचना केन्द्रले जनाएको छ ।
केन्द्रका अनुसार गत साउन १ देखि ३० कात्तिकसम्म ११ हजार पाँच सय ५९ चेक बाउन्सका कारण कालोसूचीमा परेका छन् । यस्तै, चार हजार छ सय ६६ जना कर्जा नतिरेका कारण कालोसूचीमा परेका छन् ।
समयमा कर्जा भुक्तानी नगर्ने ऋणीलाई बैंक तथा वित्तीय संस्थाको सिफारिसमा कालोसूचीमा राखिन्छ । पटक–पटक कर्जा भुक्तानीका लागि ताकेता गर्दा पनि अटेर गरेको र कतिपय सम्पर्कमा नआएका ऋणीलाई समेत कालोसूचीमा राखिएको केन्द्रले जनाएको छ ।
कालोसूचीमा राख्नका लागि सम्बन्धित बैंक तथा वित्तीय संस्थाले सिफारिस गर्नुपर्छ । पछिल्लो समय बैंक तथा वित्तीय संस्थाबाट कालोसूचीमा राखिदिन केन्द्रमा सिफारिस गर्ने क्रम बढिरहेको छ ।
अघिल्लो आवको एक वर्षमा ३० हजारभन्दा बढी कालोसूचीमा परेका थिए । जोइन्ट भेन्चर कम्पनीलाई पनि चेक बाउन्स गरेको अवस्थामा कालोसूचीमा राख्न सकिने भएकाले अहिले कालोसूची बढेको कर्जा सूचना केन्द्रका एक अधिकारीले बताए ।
वि.सं.२०८१ मंसिर २४ सोमवार ११:०५ मा प्रकाशित
