हामी सबैकाे संसारन्यूज

काठमाण्डौँ । गरिमा विकास बैंकको साधारणसभाले पाँँच प्रतिशत नगद लाभांश (करसहित) सेयरधनीलाई वितरण गर्ने प्रस्ताव पारित गरेको छ । शुक्रबार पोखरामा सम्पन्न १८औँं वार्षिक साधारणसभाले आर्थिक वर्ष २०८०/८१ को नाफाबाट सेयरधनीलाई हाल कायम चुक्तापूँजीको पाँच प्रतिशत नगद लाभांश (करसहित) वितरणको प्रस्ताव पारित गरेको हो ।

सभामा प्रस्तुत आर्थिक वर्ष २०८०/८१ को वार्षिक प्रतिवेदन लगायतका प्रस्तावहरु सर्वसम्मतिले पारित भएको बैंकले जनाएको छ । यसैगरी, सभाबाट आगामी कार्यकालका लागि संस्थापक सेयरधनीहरुको प्रतिनिधित्व गर्ने गरी तीन जना सञ्चालकहरुमा दिलिपप्रताप खाँड, श्यामप्रसाद बस्याल र दिपेन्द्र श्रेष्ठ निर्वाचित भएका छन् ।

सर्वसाधारण शेयरधनीको प्रतिनिधित्व गर्ने तीन जना संचालकहरुमा विमल पाण्डे, शोभाकान्त ढकाल र आयुष्मा कोईराला सर्वसम्मतिबाट चयन भएका छन् ।
नवनिर्वाचित सञ्चालकमध्ये बस्याल, श्रेष्ठ र पाण्डे पुराना अनुहार हुन् भने बाँकी नयाँ अनुहार हुन् ।

सभालगत्तै बसेको सञ्चालकहरुको बैठकले बैंकको सञ्चालक समितिको अध्यक्षमा दिलिपप्रताप खाँडलाई मनोनीत गरेको छ । यसअघि अध्यक्षको रुपमा श्याप्रसाद बस्यालले काम गरेका थिए ।