Sansar News
काठमाडौँ । वरिष्ठ अधिवक्ता दिनेश त्रिपाठीमाथि बुधवार हातपात गर्ने व्यक्ति प्रहरी हिरासतमा छन् । उनले आफ्नो नामबाहेक केही पनि परिचय खुलाएका छैनन् ।
स्वर्णलक्ष्मी सहकारीको बचत अपचलनसम्बन्धी मुद्दामा प्रतिवादी बनाइएका रास्वपा सभापति तथा पूर्व गृहमन्त्री रवि लामिछानेको विषयमा थुनछेक बहस सकिएपछि वरिष्ठ अधिवक्ता त्रिपाठीमाथि सामान्य हातपात भएको थियो ।
जिल्ला अदालत, काठमाडौँको हाताभित्रै त्रिपाठीमाथि हातपात गर्ने ४८ वर्षीय ललित केसी हुन् । उनी दोलखा जिल्लाको तामाकोसी गाउँपालिका–१ का स्थानीयवासी हुन् । उनी ललितपुर, टीका थलीमा डेरा गरी बस्छन् ।
बुधवार साँझ बबरमहलस्थित जिल्ला अदालत नजिकैबाट उनी पक्राउ परेका हुन् । आज मात्रै उनको म्याद थप गरिँदै छ । उनलाई प्रहरी वृत्त सिंहदरबारको हिरासतमा राखिएको छ ।
वि.सं.२०८१ माघ ३ बिहीवार १५:२८ मा प्रकाशित
