हामी सबैकाे संसारन्यूज

भुवन शिवाकोटी चौघरे, काठमाडौं

तिमी
त्यो कुर्चीमा बस्छौ
त्यो भन्दा ठुलो कुर्ची मेरो देशमा छैन

तर
त्यो कुर्चीमा तिमी बसुन्जेल
मलाई लाग्दैन
मेरो देशको स्वाभिमान अग्लिँदै जान्छ

महोदय
त्यो त्यही अग्लो कुर्ची हो
त्यहाँ बसेर तिमी
देशको अस्मितामा सम्झौता गर्छौ

तिमीलाई त्यही कुर्चीमा बसाउन
यो बाटोमा
यो माटोमा
कति रगत बग्यो सुकुलमा बस्नेहरूको
फर्केर हेर त आँखामा दृश्यहरू
र तिमी त्यहाँ बस्यौ

बिडम्बना
त्यो अग्लो कुर्चीमा तिमी बसेपछि
तिम्रो कुर्चीभन्दा तल बस्नेहरूको रगत
फेरि बगेकै छ

महाशय
हुन त
यो गोलो र गतिशील पृथ्वीमा
यो देशको माटोमा
त्यो कुर्ची कहिल्यै बदलिँदैन
परन्तु
तिमी अगाडि पनि त्यो कुर्चीमा कोही बस्थ्यो
तिमी पछि पनि कोही बस्ने छ

ऋतु बदलिए जस्तै
समय बदलिन्छ
तिमीलाई त्यो कुर्चीमा बसाउन रगत बगाउनेले
कुनैदिन
तिमीलाई लडाउन
त्यो कुर्चीबाट तिमीलाई हटाउन
फेरि रगत बगाउने छन्

यत्ति सम्झ
महासागर जस्तो
मानव रगतको बाढी
अविरल बग्दैन ।