गीता भट्टराई
गल्याङ । स्याङ्जाको कालीगण्डकी गाउँपालिकाद्वारा सञ्चालित कालीगण्डकी अस्पतालको पाँचौं स्थापना दिवसको अवसरमा मोतीबिन्दु भएका आँखाका बिरामीहरूको निःशुल्क शल्यक्रिया गरिएको छ ।
एमबि फाउन्डेसन काठमाडौँको सहयोग र हिमालय आँखा अस्पताल धारीपाटन पोखराको प्राविधिक सहयोगमा भएको शिविरमा ३९ जनाले आँखाको सफल शल्यक्रिया गरेका हुन् ।
यसैगरी अस्पतालको आयोजना, नेपाल रेडक्रस सोसाइटी श्रीकृष्ण गण्डकी उपशाखा मिर्मीको व्यवस्थापन र जिल्ला रेडक्रस शाखा स्याङ्जाको प्राविधिक सहयोगमा रक्तदान कार्यक्रम समेत भएको छ । कार्यक्रममा २२ जना रक्तदान गरेका थिए ।
गाउँपालिका तथा अस्पताल व्यवस्थापन समितिका अध्यक्ष खिम बहादुर थापाले कार्यक्रमको उद्घाटन गर्दै बिरामीलाई अस्पतालमा उपचार गराएर समय पैसा र स्वास्थ्यको सदुपयोग गर्न सुझाव दिए । राष्ट्रिय गाउँपालिका महासङ्घका महासचिव समेत रहेका उनले अस्पताल स्थापनाको उद्देश्य, अस्पतालले सिर्जना गरेको अवसर, चुनौती र भावी रणनीतिको बारेमा प्रस्ट पारेका थिए ।
कार्यक्रममा गाउँपालिकाकी उपाध्यक्ष साबित्रा कोइराला, प्रमुख प्रशासकीय अधिकृत परशुराम उपाध्याय, पालिकामा क्रियाशील विभिन्न राजनीतिक दलका प्रतिनिधिले शुभकामना दिएका थिए ।
वि.सं.२०८१ फागुन १२ सोमवार १६:४६ मा प्रकाशित
