Sansar News
काठमाडौँ । राजसंस्था पुर्नस्थापनाका लागि गठन भएको जनआन्दोलन समितिका कार्यवहाक संयोजक डा. जगमान गुरुङले वैशाख २२ गतेसम्म सामूहिक गिरफ्तारी दिने घोषणा गरेका छन् ।
बुधबार काठमाडौँमा समितिले आयोजना गरेको प्रतिवद्धता व्यक्त गर्ने कार्यक्रममा बोल्दै उनले त्यसलाई रोक्न सरकारले चैत १५ गतेको कार्यक्रमपछि जारी भएका वारेन्ट खारेज गर्नुपर्ने र नेता नवराज सुवेदीको नजरबन्द हटाउनुपर्ने सर्त राखेका छन् ।
गुरुङले भने, ‘वैशाख २२ गतेसम्म पनि यो सरकारले हाम्रा साथीहरुको वारेन्ट बर्खास्त गरेन भने, हाम्रा संयोजकको नजरबन्द हटाएन भने र बन्दी बनाइएका साथीहरुलाई मुक्त बनाइएन भने २२ गते हामी सामूहिक गिरफतारी दिन्छौं, सबैभन्दा पहिले मै हिँड्छु । म ७८ वर्षको सुगर बिरामी माटोको टिका लगाएर मै हिँड्छु । तपाईंहरु को आउनुहुन्छ, आउनुहोस् । २२ गतेको दिनमा सामूहिक गिरफ्तारी दिने ।’
यद्यपि आफूहरुको आन्दोलन भद्र हुने उनको भनाइ छ । ‘आन्दोलनमा हामी ज्यानको माया मारेर अघि बढ्नेछौं,’ गुरुङले भने, ‘हाम्रो आन्दोलन भद्रअवज्ञा हुन्छ ।’
वि.सं.२०८१ चैत २७ बुधवार १६:३४ मा प्रकाशित
