हामी सबैकाे संसारन्यूज

काठमाडौँ । राजसंस्थाको पुनर्स्थापना, सङ्घीयताको खारेजी र भ्रष्टाचारविरुद्ध राष्ट्रिय प्रजातन्त्र पार्टी (राप्रपा)ले आइतबार राजधानीमा गरेको प्रदर्शन सकिएको छ ।  राप्रपाले देशमा बढ्दो भ्रष्टाचारको विरोध र राजसंस्थाको पुनर्स्थापनाको मागसहित सङ्घीय शासन प्रणालीको खारेजी माग गर्दै प्रदर्शन गरेको थियो ।

बिहानैदेखि राप्रपाका नेता तथा कार्यकर्ता बिजुली बजारबाट जुलुससहित नयाँ बानेश्वरस्थित निषेधित क्षेत्र नजिक पुगेर प्रदर्शन गरेका थिए ।

यता सिंहदरबारस्थित संसदीय दलको कार्यालयमा प्रदर्शन गर्ने क्रममा राप्रपाका अध्यक्ष राजेन्द्र लिङ्देन सहित शीर्ष नेताहरू उपाध्यक्ष बुद्धिमान तामाङ र प्रवक्ता ज्ञानेन्द्र शाहीलाई प्रहरीले नियन्त्रणमा लिएको छ ।  आफ्ना नेताहरू पक्राउ परेपछि आइतबार अपराह्न ४ बजे राप्रपाले आकस्मिक बैठक बोलाएको छ । बैठक पार्टी कार्यालय धुम्बाराहीमा बस्ने छ ।