हामी सबैकाे संसारन्यूज

पर्वत । पर्वतमा एमाले दुई समूहबिच झडप हुँदा एक युवा घाइते भएका छन् । पार्टी कार्यालय कुस्मामा बुधवार युवा संघको अधिवेशनको विषयलाई लिएर दुई पक्षबिच झडप भएको हो । झडपमा नेकपा एमाले गण्डकी प्रदेशका सदस्य एवं युवा संघका नेता अर्जुन पौडेलको टाउकाेमा चोट लागेको छ ।

अधिवेशन आज गर्ने र नगर्ने भन्ने विषयमा दुई पक्षबिच विवाद चर्किँदै जाँदा झडप भएको विशेष स्रोतले जनाए । स्रोतका अनुसार पूर्व मन्त्री पदम गिरी समूहले राष्ट्रिय सभाका पूर्व अध्यक्ष गणेशप्रसाद तिमिल्सिना समूहका पौडेलको टाउको टाउकोमा प्रहार गरेका हुन् ।

उनको स्थानीय मेडिकल शान्तिदीपमा प्राथमिक उपचारपछि थप उपचारका लागि पोखरा पठाइएको छ ।  गिरी पक्षले युवा संघको अध्यक्ष विनोद थापा भए पनि उपाध्यक्ष आशिष् श्रेष्ठको अध्यक्षता र उपसचिव ध्रुव श्रेष्ठको सञ्चालनमा उद्घाटन कार्यक्रम भएको थियो । पार्टी कार्यालयमा सुरक्षा घेराबिच गिरी पक्षले कार्यक्रम गरिरहेको छ ।

तिमिल्सिना पक्षका युवाले अधिवेशन रोक्न माग गर्दै कार्यक्रम स्थलमा पुगेपछि दुई पक्षबिच हानाहान भएको स्रोतले बताएको छ ।