हामी सबैकाे संसारन्यूज

काठमाडौँ । स्याङजा भित्र बिरुवा गाउँपालिका सबैभन्दा बेरुजु भएको पालिका बनेको छ । महालेखापरीक्षकले सार्वजनिक गरेको ६२औँ वार्षिक प्रतिवेदनमा कुल रकममा ०.१२ प्रतिशत मात्रै बेरुजुमा झरालेसँगै बिरुवा गाउँपालिकाले जिल्लामा यो वर्ष किर्तिमान बनाएको हो ।

प्रतिवेदनका अनुसार बिरुवा पछि बेरुजु कम बनाउने पालिकामा कालीगण्डकी गाउँपालिका छ । कालीगण्डकीको ०.२४ प्रतिशत मात्रै बेरुजु देखिएको छ । फेदीखोला गाउँपालिमा कुल बजेटको ०.३४ प्रतिशत बेरुजु छ । बेरुजु कम गर्नेमा जिल्ला भित्र फेदीखोला गाउँपालिका तेस्रो स्थानमा छ । फेदीखोला पछि अर्जुनचौपारी गाउँपालिकाको बेरुजु ०.३७ प्रतिशत छ ।

पुतलीबजार नगरपालिका मध्यम बेरुजु हुने पालिकाको सूचिमा छ । पुतलीबजारको बेरुजु ०.६१ छ भने गल्याङ नगरपालिकाको बेरुजु ०.६६ प्रतिशत रहेको महालेखापरीक्षकले सार्वजनिक गरेको सूचिमा छ ।

हरिनास धेरै बेरुजु हुने पालिकाको पहिलो सूचिमा

जिल्लामा सबै भन्दा धेरै बेरुजु ४.६३ प्रतिशत हुने पालिका हरिनास गाउँपालिका रहेको प्रतिवेदनले देखाएको छ । यसपछि चापाकोट नगरपालिकाको बेरुजु २.०४ प्रतिशतमा छ ।

वालिङ नगरपालिकाको बेरुजु १.०१ प्रतिशत, भीरकोट नगरपालिको ०.८० र आँधिखोला गाउँपालिकाको ०.७८ प्रतिशत बेरुजु रहेको सार्वजनिक प्रतिवेदनमा छ ।