हामी सबैकाे संसारन्यूज

पोखरा । गण्डकी प्रदेशको भौतिक पूर्वाधार विकास तथा यातायात व्यवस्था मन्त्रालयले आन्दोलनरत यातायात व्यवसायीलाई वार्तामा आउन पुनः आह्वान गरेको छ । आइतबार आयोजित पत्रकार सम्मेलनमा मन्त्रालयले व्यवसायीहरूलाई बन्द र हड्ताल स्थगित गरी छलफलमा सहभागी हुन आग्रह गरेको हो ।

मन्त्रालयका सचिव एवं वार्ता समितिका संयोजक कमलकुमार अधिकारीले नेपाल यातायात व्यवसायी राष्ट्रिय महासङ्घलाई वार्तामा बोलाए पनि सहभागिता नभएको बताए । उनले नियमावलीका विषयमा छलफल गर्न सकिने, तर खारेज नहुने स्पष्ट पारे ।

मन्त्रालयका उपसचिव प्रेम सुवेदीले नियमावली निर्माणमा लामो समयदेखि छलफल भएको र व्यवसायीहरूले समेत हस्ताक्षर गरेको बताए । मन्त्रालयले वार्ताका लागि सचिव अधिकारीको नेतृत्वमा ५ सदस्यीय टोली गठन गरेको थियो । जेठ १४ मा वार्ताका लागि बोलाए पनि व्यवसायीहरूले ७ बुँदे मागसहितको पत्र पठाउँदै सहभागिता जनाएनन् ।

त्यसपछि उनीहरूले जेठ १६ देखि गण्डकी प्रदेशभर सार्वजनिक यातायात ठप्प पारेका छन् । व्यवसायीहरूले सोमबारदेखि देशभर नै यातायात बन्द गर्ने घोषणा गरेका छन् ।