Sansar News
काठमाडौं । नबिल बैंकको प्रमुख कार्यकारी अधिकृत (सीइओ)मा मनोजकुमार ज्ञवाली नियुक्त भएका छन् । बिहीबार बसेको बैंक सञ्चालक समितिको ६८२ औं बैठकले कामु सीइओ रहेका ज्ञवलीलाई व्यवस्थापनको नेतृत्वमा चयन गरेको हो ।
यही जेठ २२ गतेदेखि लागू हुने गरी ४ वर्षका लागि उनी प्रमुख कार्यकारी अधिकृत नियुक्त भएका हुन् । ज्ञानेन्द्र ढुंगानाले गत चैत १० गतेदेखि लागू हुने गरी सीइओ पदबाट राजीनामा दिएपछि बैंक सञ्चालक समितिले उनलाई कामु सीइओको जिम्मेवारी दिएको थियो ।
नबिलमा उनी नायब महाप्रबन्धकबाट प्रवेश गरेका हुन् । महाप्रबन्धक, नायब प्रमुख कार्यकारी अधिकृत, वरिष्ठ नायब प्रमुख कार्यकारी अधिकृत हुँदै ज्ञवाली बिहीबारबाट प्रमुख कार्यकारी अधिकृत नियुक्त भएका हुन् ।
ज्ञवाली बैकिङ क्षेत्रमा स्पष्ट वक्ताका रुपमा चिनिन्छन् । उनले नेपाल राष्ट्र बैंक लगायत विभिन्न वाणिज्य बैंकको व्यवस्थापन तहमा नेतृत्वदायी भूमिकामा रही बैंकिङ क्षेत्रको अनुभव बटुलीसकेका छन् ।
उनीसँग बैंकहरुको नियमनकारी निकाय नेपाल राष्ट्र बैंक, ग्लोबल आइएमई बैंक, ग्लोबल आइएमई क्यापिटल र ज्योति विकास बैंकसहित पुँजीबजार तथा बैंकिङ क्षेत्रमा २६ वर्ष लामोे अनुभव छ । ज्ञवालीको कुशल र सक्षम नेतृत्वले आगामी दिनमा नबिल बैंक लिमिटेडले विभिन्न वित्तीय सूचकाङ्कहरूमा अग्रणी स्थान हासिल गर्ने अपेक्षा राखिएकाे छ ।
त्यस्तै सोही समितीले नायब महाप्रबन्धक आदर्श बजगाँइलाई नायब प्रमुख कार्यकारी अधिकृतमा बढुवा गरेको छ भने प्रमुख कानुन विभाग भिष्म न्यौपानेलाई कम्पनी सचिवको जिम्मेवारी दिएको छ ।
वि.सं.२०८२ जेठ २२ बिहीवार १२:१४ मा प्रकाशित
