Sansar News
काठमाडौँ । इन्द्रजात्राको लिङ्गो नगर प्रवेश गराइएको छ । नेपाल पञ्चाङ्ग निर्णायक विकास समितिले दिएको साइतअनुसार आज बिहान ९ः५२ बजे इन्द्रजात्राको लिङ्गो नगर प्रवेश गराइएको गुठी संस्थानले जनाएको छ ।
भोटेबहालबाट इन्द्रजात्राको लिङ्गो घिसारेर वसन्तपुर दरबार क्षेत्रस्थित कालभैरवको मूर्तिअघि लगी राख्नुलाई नगर प्रवेश गराउनु भनिन्छ । इन्द्रजात्राको लिङ्गो नगर प्रवेशका लागि घिसार्नेलगायत काममा परम्परादेखि मानन्धर समुदाय सक्रिय हुने गरेकाले सोहीअनुसार नगर प्रवेश गराइएको संस्थान काठमाडौँ शाखा कार्यालयका प्रमुख लक्षुणा शर्माले जानकारी दिए ।
भाद्र शुक्ल द्वितीयाको राति भक्तपुरस्थित चित्तपोल सामुदायिक वनमा काटिएको सल्लाको रुख त्यसको भोलिपल्ट घिसार्दै भोटाहिटीमा ल्याई राखिएको थियो । इन्द्रजात्राको लिङ्गोका लागि ल्याइएको त्यही सल्लाको रुखलाई आज भोटाहिटीबाट नगर प्रवेश गराइएको संस्थान केन्द्रीय कार्यालयका सहायक इञ्जिनीयर भीमप्रसाद अधिकारीले जानकारी दिए ।
सोही लिङ्गो भदौ १९ गते भाद्र शुक्ल द्वादशीको बिहान १०ः३१ बजे इन्द्रध्वजोत्थान अर्थात् लिङ्गो उठाउने गरिन्छ । बाँस, डोरीलगायत सामग्रीको सहायताले इन्द्रध्वजोत्थान गरिन्छ । इन्द्रध्वज र पताकासहित तान्त्रिक विधिले इन्द्रध्वजोत्थान गरिन्छ ।
इन्द्रध्वजोत्थान गरेपछि भाद्र शुक्ल चतुर्दशीअर्थात् अनन्त चतुर्दशीका दिन राष्ट्रपति रामचन्द्र पौडेलसहित विशिष्ट व्यक्तित्वको उपस्थितिमा कुमारी, गणेश र भैरवको यात्रा गराइन्छ । यो दिन इन्द्रजात्राको मुख्य दिन हो ।
वि.सं.२०८२ भदौ १५ आइतवार १६:०८ मा प्रकाशित
