हामी सबैकाे संसारन्यूज

कल्पना अधिकारी टोखा, काठमाडौँ

सकल युवक जागे देशको भाग्य फेर्न
समय छ अझ बाँकी जोश उत्साह हेर्न ।
कुटिल र हुतिहारा सोचलाई पछार्न
युवक अनुज थाले, वृद्धका कर्म फेर्न ।१।

जब सबल युवाको जोशिलो रक्त जाग्छ
थकित मुलुकले यो शान्तिको सास फेर्छ
कतिपय शठ लागे गेह आफ्नै ततेर्न
युवक अनुज थाले, वृद्धका कर्म फेर्न ।२।

जब दन दन आगो राष्ट्रमा बल्न थाल्यो
भतभतभत छाती भित्र झन् पोल्न थाल्यो
कठिन छ अब सोचे भेलमा नाउ तर्न
युवक अनुज थाले, वृद्धका कर्म फेर्न ।३।

तहसनहस सारा देश बन्दा खरानी
टुलुटुलुटुलु हेर्छन् मूर्ख लाजै नमानी
निडर युवक लागे भ्रष्टका गेह घेर्न
युवक अनुज थाले, वृद्धका कर्म फेर्न ।४।

असिनपसिन पारे भ्रष्ट नेता पछारे
कतिपय जनलाई गेहबाटै लघारे
मुलुक र जन लागे सूत्रमा एक बेर्न
युवक अनुज थाले, वृद्धका कर्म फेर्न ।५।

छन्द : मालिनी
गण : न न म य य
गण सङ्केत : III – III – SSS – ISS – ISS

अभ्यास : भक्तपुर बुढ्यौली साहित्य समाज